Կենսաթոշակային համակարգի բարեփոխումը պատասխանն է նախկին կոալիցիոն կառավարության գործողությունների: Այս մասին, այսօր՝ հունիսի 19-ին, ԱԺ-ում հայտարարել է աշխատանքի եւ սոցիալական հարցերի նախարար Արտեմ Ասատրյանը՝ պատասխանելով ՀՅԴ խմբակցության պատգամավոր, 2003-2008 թվականներին աշխատանքի նախարար Աղվան Վարդանյանին:

Նրա խոսքով՝ անցումը կուտակային համակարգի անհրաժեշտություն է, որպեսզի թոշակների ինստիտուտը անցում կատարի ֆինանսական հավասարակշռության:

Կենսաթոշակների սուբսիդավորումը պետական այլ աղբյուրներից (հիմնականում հարկերից) կտրուկ ավելացել է, երբ 2008-ին հայտարարվեց կենսաթոշակները 60 տոկոսով բարձրացնելու անհրաժեշտության մասին: Դրանից հետո միայն սոցվճարները դադարեցին բավարարելն կենսաթոշակային համակարգին: «Կարծում եմ, այդ սոցիալական քաղաքականությունը, որի մշակմանը մասնակցել եք նաեւ դուք, արդարացված էր: բայց հիմա պետք է համակարգն ավելի արդյունավետ եւ հասցեական դարձնել»,-ասել է նախարարը: