Եկեք բոլորս մի- մի դոլար հավաքենք եւ գնենք ավտոկայանատեղիները տնօրինող «Փարկինգ սիթի սերվիս» ընկերության վաճառքի հանած բաժնետոմսերը, որ հետո վերացնենք կարմիր գծերը:  Այսօր՝ հունիսի 21-ին, լրագրողներ հետ զրույցում այսպիսի առաջարկություն արեց  «Դուրս մեր գրպանից»  նախաձեռնության անդամ Արշակ Զաքարյանը:

«Փարկինգ սիթի սերվիս» ընկերության տնօրեն Վազգեն Հարությունյանը նախորդ տարի էլ հայտարարել էր,  թե իրենց կատարած ներդրումների ծավալը կազմելու է 5 մլն դոլար, ու այս տարի էլ են պատրաստվում 5 մլն դոլար ներդնել։ Այդ հինգ միլիոնը  տեսնեն ինչի՞ վրա է ծախսել, չինական ներկերի՞: Մենք ուզում ենք, որ ընդհանրապես վերացվեն այդ կարմիր գծերը»,- ասաց Արշակ Զաքարյանը

Նախաձեռնության անդամները՝  անդրադառնալով հունիս 10-ին իրենց կազմակերպված ավտոերթին, երբ ոստիկանները փակել էին իրենց ճանապարհը եւ11 հոգու բերման ենթարկել, ասացին, որ այս օրը ոստիկանները խախտել են բոլոր հնարավոր օրենքները:

«Ճանապարհային ոստիկանությունը իրենց պետի՝ Արշակյան Արսենի գլխավորությամբ, փակեցին մեր ճանապարհը եւ խցանեցին փողոցը: Մենք քարշակ չենք, ոչ էլ կռունկ, փակած ճանապարհից  մեր մեքենաները հեռացնեինք: Իսկ երբ եկավ փոխոստիկանապետ Օսիպյանը ու  հրամայեց, որ ակտիվիստներին տանեն, ոստիկանները սկսեցին գողանալ իրենց ճանաչած ակտիվիստներին: Դա բացահայտ հանցագործություն էր՝մարդու իրավուքնների խախտում»,- նշեց Արթուր Կրոյանը, ում  իր մեքենայի հետ միասին հունիս 10-ին քարշակով տեղափոխել էին տուգանային հրապարակ:

Արթուր Կրոյանը պատմեց, որ իր մեքենան այդ օրը վեց ժամ պահել են տուգանային հրապարակում, առանց բացատրության. «Պայման էին դնում ՝դու պետք է առաջ ընթանաս ձախով՝ դեպի հետ, բայց ինձ պետք էր ուղիղ գնալ: Հետո քարշակով եւ դրոշով  ինձ տարան փոսի գայի: Բացատրության չէին տալիս,  թե երբ են բաց թողնելու: Երբ եկան մարդու իրավունքների պաշտպանները ,  նոր ինձ ազատ թողեցին եւ տուգանք գրեցին տասը հազար դրամի չափով: Ասացին, թե  խոչընդոտել եմ երթեւեկությանը»:

Նախաձեռնության անդամ Արմեն Միքայելյանն էլ ասաց, որ եթե ոստիկանությունը այդ կերպ փորձել է իրենց ճնշել, ապադա անհաջող փորձ էր:

«Պայքարը շարունակվելու է մինչեւ մեր բոլոր պահանջները կատարվեն, մենք ակցիաների բնույթը, ձեւը կփոխենք, որ չկարողանան ոստիկանները խոչընդոտել: Իրենք թեթեւակի կոսմետիկ փոփոխություններ են փորձում անել, բայց շարունակում են մարդկանց  դեմ թակարդներ լարել»,-հայտարարեց Արմեն Միքայելյանը:

Նշենք, որ «Դուրս մեր գրպանից» նախաձեռնությունը պահանջում է վերացնել կարմիր գծերը, 5 անգամ կրճատել տեսախցիկների եւ արագաչափերի տուգանքները, մինչեւ այժմ գրանցված տուգանքների վրա եկած տույժերի նկատմամբ հայտարարել համաներում եւ դադարեցնել բոլոր տեսակի տուգանքները մինչեւ նոր կանոնակարգի հաստատվելը: