Հունիսի 28-ին Երեւանի կենդանաբանական այգին այցելուների համար բաց կլինի առավոտյան ժամը 09:30-ից մինչեւ 16:00-ն:  Այնուհետեւ ժամը 18:00-ից այգում կմեկնարկի «Երազանքի գիշեր Երեւանի կենդանաբանական այգում» միջոցառումը, որի ընթացքում այգին կհյուրընկալի շուրջ 60 հաշմանդամ երեխաների` նրանց ծնողների, խնամակալների, քույրերի եւ եղբայրների հետ:

Հրավիրվածների համար այգին նախապատրաստել է բացառիկ ծրագիր. փոքրիկները հնարավորություն կունենան շրջելու կենդանաբանական այգում եւ անմիջականորեն շփվելու կենդանիների հետ:

Ծրագրի մաս կազմող «Իրականացնենք երեխայի երազանքը» նախաձեռնությամբ էլ միջոցառման աջակիցների եւ գործընկերների օգնությամբ կիրականանան հրավիրված երեխաների նախապես հայտնած ցանկություններն ու երազանքները:

Օրվա խորհուրդը ոչ միայն սահմանափակ կարողություններով երեխաներին անմոռանալի երեկո պարգեւելն է, այլեւ հավելյալ այն խնդիրների մասին բարձրաձայնելը, որոնց նրանք ստիպված են բախվել առօրյա կյանքում:

Նկատենք, որ «Երազանքի գիշեր կենդանաբանական այգում» խորագրով միջոցառումներն աշխարհի տասնյակ քաղաքներում իրականացվում են ամեն տարի: