նախընտրելի դարձնել
Վրաստանի խորհրդարանը վավերացրել է ԵՄ-ի հետ ասոցացման համաձայնագիրը։ Այն ընդունվել է միաձայն՝ 123 «կողմ»ձայնով։ Հիշեցնենք, որ Վրաստանի խորհրդարանը առավոտից քննարկում էր Վրաստանի եւ ԵՄ-ի միջեւ ստորագրված ասոցացման համաձայնագիրը։ Դրա էությունը եւ հիմնական կողմերը պատգամավորներին ներկայացրել է արտգործնախարար Մայա Փանջիկիձեն։
Խոր եւ համապարփակ առեւտրի կարեւորության մասին խոսել է Էկոնոմիկայի նախարար Գեորգի Կվիրիկաշվիլին։
Նախարարներից հետո ամբիոնին են մոտեցել պատգամավորները։ Խոհրդարանի արտահերթ նիստի երկրորդ մասը սկսվել է հրավիրված հյուրերի ելույթներից։ Սկզբում ամբիոնին է մոտեցել վարչապետ Իրակլի Գարիբաշվիլին, այնուհետեւ՝ եվրահանձնակատար Շտեֆան Ֆյուլեն։
Այնուհետեւ ամբիոնին են մոտեցել Լատվիայի եւ Բուլղարիայի արտգործնախարարները եւ Ավստրիայի խորհրդարանի նախագահը, որը վրաց հասարակությանը շնորհավորել է Եվրոպայի հետ սերտացման կապակցությամբ, փոխանցում է «Գռուզիա օնլայնը»։
Խորհրդարանի նիստին ներկա են եղել նաեւ Վրաստանում հավատարմագրված արտասահմանցի դիվանագետները։
Այնուհետեւ փաստաթղթի վավերացումը նշել են տոնական մթնոլորտում։
