Արցախի Հանրապետության վարչապետ Արա Հարությունյանը հուլիսի 18-ին ընդունել է «Լույս» հիմնադրամի մի խումբ ուսանողների եւ հույս հայտնել, որ նրանք ստացած գիտելիքներն ապագայում կծառայեն երկրի շենացման գործին:

ԼՂՀ կառավարության մամուլի ծառայությունից հայտնում են, որ ողջունելով աշխարհի լավագույն բուհերում սովորող երիտասարդներին` վարչապետը նշել է, որ հայրենիքը նրանց կարիքը շատ է զգում: Ներկայացնելով այցի նպատակները՝ երիտասարդները նշել են, որ ուսումնասիրություններ են իրականացնում Շուշիի զարգացման ծրագիր մշակելու ուղղությամբ, ինչպես նաեւ ցանկություն ունեն Արցախն աշխարհում նոր հետաքրքրությունների տեսանկյունից ներկայացնելու:

Ուսանողների խնդրանքով՝ Ա. Հարությունյանը խոսել է Արցախում կրթության եւ տնտեսության զարգացման հեռանկարների եւ այդ ուղղությամբ կառավարության կողմից ձեռնարկվող քայլերի մասին:

ԼՂՀ վարչապետը, մասնավորապես, շեշտադրել է, որ «Հայաստան» համահայկական հիմնադրամի եւ ԼՂՀ կառավարության համաֆինանսավորմամբ Շուշի քաղաքում արհեստագործական ժամանակակից դպրոց է կառուցվում, որտեղ դասավանդման համար նախատեսվում է ներգրավել հայ անվանի գիտնականների:

Խոսելով տնտեսության զարգացման հիմնական ուղղությունների մասին` ԼՂՀ գործադիրի ղեկավարն անդրադարձել է հատկապես հանքարդյունաբերության, գյուղատնտեսության եւ զբոսաշրջության ոլորտներին:

Եթե հանքարդյունաբերությունում զարգացում ապահովելու համար տեղում մասնագետներ պատրաստելու կարիք է զգացվում, ապա մյուս երկու ուղղություններում, բացի որակյալ մասնագետների պատրաստումից, վարչապետը երիտասարդներին բրենդավորման ու փիարի ուղղությամբ նոր ծրագրեր մշակելու եւ իրականացնելու կոչ է արել:

Հանդիպման ընթացքում Ա. Հարությունյանը պատասխանել է նաեւ ուսանողներին հետաքրքրող այլ հարցերի: