Նախընտրելի
Խմելու ջրի մատակարարման ոլորտում առկա լուրջ խնդիրներից մեկը կորուստն է: Պաշտոնական տվյալների համաձայն՝ անցյալ տարի բաց թողնված 525.2 մլն խորանարդ մետր ջրից 416.4 մլն-ը կամ 79.3 տոկոսը կորցրել են: Այսինքն՝ մեկ տարվա ընթացքում ջրի ծավալի ավելի քան երեք չորրորդ մասը պարզապես հոսել է անհայտ ուղղությամբ:
Այս կապակցությամբ ռեկորդակիր է մայրաքաղաքը, որին բաժին է հասնում երկրում «անհետացած» ջրի ամբողջ ծավալի ավելի քան կեսը: Մայրաքաղաքում խմելու ջրի կորուստը հսկայական է՝ չնայած մատակարարի խոստումներին, որը կայուն տատանվում է 80 տոկոսի ցուցանիշի շուրջ:
Անցյալ տարին բացառություն չէր. մայրաքաղաքին մատակարարված 288.1 մլն խորանարդ մետրից «անհետացել է» ավելի քան 228.8 մլն խորանարդ մետրը՝ 79.4 տոկոսը: Համեմատության համար նշենք, որ վերջին 10 տարիների ընթացքում կորստի ծավալը բավական կլիներ Սեւանի մակարդակը 1 մետրով բարձրացնելու համար:
Կորստի պատճառները բազմաթիվ են: Կարող ենք ենթադրել անօրինական օգտագործումը՝ ինչպես ֆիզիկական, այնպես էլ իրավաբանական անձանց կողմից: Այստեղ իր դերն ունի նաեւ ջրատար համակարգի մաշվածությունը:
«Երեւան Ջուր» ՓԲԸ-ի ներկայացուցիչների խոսքով (որն այժմ պատկանում է ֆրանսիական «Veolia Enviroment SA» ընկերությանը), ջրամատակարարման համակարգի բարեկարգման համար մայրաքաղաքը 0.6 մլրդ դոլար ներդրման կարիք ունի: Մեր իրականության համար սա ֆանտաստիկ թիվ է, ուստի մոտ ապագայում խողովակների լիարժեք փոխարինում դեռեւս չի ակնկալվում:
Նշենք, որ վերջին 8 տարիների ընթացքում մայրաքաղաքի ցանցի արդիականացման համար շուրջ 45 մլն դոլար է ծախսվել: Նման տեմպերի դեպքում, լիարժեք փոխարինման համար կես դար կպահանջվի: Հասկանալի է, որ այդ ընթացքում պիտանի չեն լինի արդեն նոր խողովակները, այնպես որ՝ դրանք փոխարինելու կարիք նույնպես կլինի:
Կորստի բացարձակ ցուցանիշով առաջին տեղում է մայրաքաղաքը: Սակայն տոկոսային հարաբերակցությամբ առաջատար է Շիրակի մարզը, որտեղ ջրի կորուստն անցյալ տարի կազմել է 86.0 տոկոս: Առավելի քիչ կորուստ գրանցվել է Սյունիքի մարզում (63.3 տոկոս):
