Մալայզիայի պաշտպանության նախարար Հուսեյն Հիշամուդդինը Դոնբասում մալայզիական Boeing-ի վթարի քննության նախնական արդյունքները բնորոշել է որպես «շատ լավ»:

Սեպտեմբերի 9-ին Նիդեռլանդները նախնական զեկույց էր հրապարակել Մալայզիայի Boeing-ի վթարի մասին: Փորձագետները հաստատել էին, որ օդանավը  քանդվել է թռիչքի ժամանակ՝ «կառուցվածքային վնասվածքների պատճառով, որոնք առաջացել են բազմաթիվ բարձրէներգետիկ  օբյեկտների արտաքին ազդեցության հետեւանքով», սակայն  դեռ չի հաջողվել հաստատել այդ օբյեկտների աղբյուրը:

«Քննության արդյունքները շատ լավն են: Ես Մոսկվա եմ եկել անմիջապես Կիեւից եւ այժմ հանդիպելու եմ արտգործնախարարի տեղակալի հետ: Ես կստանամ երկու կողմերի տեսակետները, եւ այդ տեղեկությունը իմ ակնկալիքներից ավելին է», — ասել է Հիշամուդդինը, փոխանցում է «ՌԻԱ Նովոստին»:

Չորեքշաբթի Հիշամուդդինը հանդիպել է ՌԴ պաշտպանության նախարար Սերգեյ Շոյգուի հետ: Շոյգուն հայտարարել է, որ ՌԴ ՊՆ-ն պատրաստ է Մալայզիային անհրաժեշտ ողջ օգնությունը ցուցաբերել վթարի պատճառները պարզելու համար: Ըստ նրա՝ ողբերգության պատճառների քննությունը պետք է դառնա համաշխարհային հանրության  սեփականությունը:

Վթարի պատճառների վերջնական եզրակացությունները պետք է հրապարակվեն վթարից հետո մեկ տարվա ընթացքում, սակայն  ժամանակահատվածը կարող է  խմբագրվել՝ «կախված քննության ընթացքից»: