նախընտրելի դարձնելՀոկտեմբերի 10-ի առավոտյան ԱՄՆ հատուկ ծառայությունների նախկին գործակալ Էդվարդ Սնոուդենի առեղծվածային արձանը հայտնվել է Նյու Յորքի կենտրոնում՝ Յունիոն սքվերի հրապարակից ոչ հեռու, հայտնում է «Business Insider»-ը:
Արձանը դրվել է անմիջապես նախագահ Աբրահամ Լինքոլնի հուշարձանի դիմաց: Ավելի ուշ պարզվել է, որ արվեստի երեքմետրանոց գլուխգործոցը ամերիկացի երիտասարդ քանդակագործ Ջիմ Դեսիչինոյի աշխատանքն է: Ըստ նրա՝ ինքն արձանի վրա սկսել է աշխատել 2013 թ. սեպտեմբերից՝ Դելավերի համալսարանում ուսանելիս:
«Այն, ինչ արեց Էդվարդ Սնոուդենը, հնարավոր է, իմ սերնդի ամենանշանակալից արարքն է», - ասել է Դեսիչինոն «Business Insider»-ի հարցազրույցում: Լրագրողի հարցին՝ ինքը Սնոուդենին հայրենասեր, թե դավաճան է համարում, քանդակագործը պատասխանել է, որ հարցն անտեղի է, քանի որ նրա արարքն «ավելին է նշանակում, քան ինքը»:
Դեսիչինոյի քանդակը մշտական տեղ չունի, քանի որ այն տեղադրելու համապատասխան թույլտվություն չկա: Այդպիսով, քանդակը ստիպված «ճամփորդում է» ողջ քաղաքում: Ավելին, այն Twitter-ում արդեն էջ ունի, որտեղ քանդակի եղած վայրերից լուսանկարներ են տեղադրվում:
