Մի խումբ քաղաքացիական ակտիվիստներ հանդես են եկել ուղերձով, որտեղ կոչ են անում բոլորին ԵՏՄ անդամակցության պայմանագրի վավերացման օրը ցույցի դուրս գալ Ազգային ժողովի մոտ եւ թույլ չտալ նման որոշման կայացումը:
Ուղերձում ասվում է.
«Հայրենակիցներ,
Հայ ժողովուրդ,
Հայաստանցիներ,
Հայաստանի 23-ամյա անկախության գլխին մահացու վտանգ է կախված. Հայաստանի ղեկավարումը վերցրած իշխանությունը եւ կուսակցությունները երկիրը տանում են Եվրասիական տնտեսական միություն, ուր Հայաստանը կցորդի կարգավիճակում է:
ԵՏՄ-ին ՀՀ անդամակցությունը հակասում է ՀՀ Անկախության Հռչակագրին եւ Սահմանադրությանը եւ նշանակում է ենթակայություն Ռուսաստանին.
- քաղաքական ասպարեզում. Հայաստանը կորցնում է ինքնուրույն արտաքին քաղաքականություն վարելու իրավունքը,
- Ղարաբաղը Հայաստանից անջատվելու է օտար մաքսակետով. ԵՏՄ անդամ երկրները զինում են Ադրբեջանին,
- կրթության ոլորտում. վերականգնվելու են ռուսական դպրոցները, եւ ռուսաց լեզուն վերագտնելու է իր երբեմնի գերիշխանությունը,
- օրենսդիր ասպարեզում. ՀՀ օրենսդրությունը համապատասխանեցվում է ռուսականին,
- տնտեսական ոլորտում. ՀՀ տնտեսության հնարավորությունները սահմանափակվում են հետադեմ տնտեսական գործընկերներով՝ Ռուսաստան, Ղազախստան, Բելառուս: Հայաստանի գործարար կապերն անցնելու են մոսկովյան հաստատությունների միջանցքներով. Հայաստանը կարող է հրաժարվել սեփական արժույթից,
- լրատվական ոլորտում. ոտնահարվելու է խոսքի, մամուլի, տեղեկատվության ազատությունը. հայաստանյան տեղեկատավական միջոցները գործելու են Մոսկվայի թելադրանքով:
Հայրենակիցներ,
Հայաստան ամրոցի դարպասների բանալիները դավաճանաբար հանձնվել են միլիտարիստական Ռուսաստանի իշխանություններին: Ամրոցի վերջնական գրավվմանը մնացել է մեկ քայլ. ՀՀ Ազգային ժողովի նիստում ԵՏՄ-ին ՀՀ անդամակցության մասին պայմանագրի վավերացումը:
Կասեցնենք այդ պատմական խայտառակ գործընթացը՝ սերունդներին թողնելով ոչ թե ընկճված, հպատակեցված երկիր, այլ հպարտ, արժանապատիվ, արդար, ազատ եւ անկախ Հայրենիք:
Սա մեր պարտքն է մեր հայրենիքի, նրա ներկա եւ ապագա սերունդների առջեւ:
Հայ ժողովուրդ,
մենք ցույց ենք տվել, որ ճակատագրական պահին կարող ենք համախմբվել եւ ետ մղել մեր ազատության սպառնալիքները եւ դրանք կրող ուժերին:
Ժամանակն է ցույց տալու, որ մենք հպարտ, ազատատենչ եւ ըմբոստ ժողովուրդ ենք:
Ազգային ժողովում ԵՏՄ անդամակցության պայմանագրի վավերացման օրը բոլորս դեպի Ազգային ժողով՝ կանխելու պետական խայտառակությունը:
Զինվորական, ուսուցիչ, բանվոր, բժիշկ, գյուղացի, գիտնական, արվեստագետ, մտավորական, լրագրող. մի պահ թողնենք առտնին հոգսերը եւ միավորվենք հանուն ազատության: Մենք այդպես հաղթեցինք Սարդարապատում եւ ղարաբաղյան պատերազմում:
Բոլորս դեպի ազատություն:
Նախաձեռնող խումբ
Դանիել Իոննիսյան
Ֆելիքս Հայրապետյան
Զարուհի Հովհաննիսյան
Նարինե Մկրտչյան
Ստյոպա Սաֆարյան
Նարեկ Սամսոնյան
Ուղերձը բաց է միանալու համար:





























