Երեւանի քաղաքապետարանի yerevan.am կայքում արդեն դրված են իր ենթակայության դպրոցների նախահաշիվներն ու  հաստիքացուցակները: Այս մասին հայտարարություն է տարածել Երեւանի ավագանու «Բարեւ Երեւան» խմբակցության անդամ Անահիտ Բախշյանը եւ իր գոհունակությունը հայտնել այդ կապակցությամբ:

«Դպրոցների գործունեության առավել թափանցիկության ու հրապարակայնության ապահովման  Երեւանի  քաղաքապետարանի  փորձը  օրինակելի է:  2014 թվականի Երեւանի զարգացման ծրագրում  նախատեսված «Դպրոցնեերի գործունեության առավել թափանցիկության ու հրապարակայնության ապահովում»  կետն արդեն իրականացվել է:

Երեւանի քաղաքապետարանի yerevan.am կայքում արդեն դրված են իր ենթակայության դպրոցների նախահաշիվներն ու  հաստիքացուցակները: Շուտով կտեղադրվեն  նաեւ  դպրոցների տարիֆիկացիաներում առկա բոլոր թվային տեղեկությունները:

Մեկ այլ լավ տեղեկություն. սույն թվականի սեպտեմբերի 9-ին  Երեւանի քաղաքապետին  առաջարկ էինք ներկայացրել  Երեւանի ավագանու 3  խմբակցություններից  մեկական  անդամի ընդգրկել մանկապարտեզների սննդի գնման նոր պայմանագրերի կնքման հանձնաժողովում ու անհավանական  ցածր  գին առաջարկող մատակարարների մոտ սննդի անվտանգության տեսչության կողմից իրականացնել  ստուգումներ:

Տեղեկացնեմ հասարակությանը, որ  արդեն ստացել ենք հանձնաժողովում մասնակցելու առաջարկն ու մասնակցելու ենք, նամանավանդ որ նախատեսված սննդամթերքի առաջարկված ցանկի եւ տեխնիկական բնութագրի  վերաբերյալ տվել ենք դրական կարծիք  ու  ընդամենը երկու առաջարկ:

Համագործակցությունը տալիս է իր պտուղները»,-նշել է Բախշյանը: