Դերասան Վարդան Պետրոսյանի փաստաբան Նիկոլայ Բաղդասարյանը համոզված է, որ իր պաշտպանյալը պատիժը կրելու է ազատ ռեժիմով:
Այսօր` հունվարի 22-ին, լրագրողների հետ հանդիպման ժամանակ փաստաբանը նշեց, որ կարեւոր չէ, թե քանի տարի է պահանջել մեղադրող կողմը եւ ինչ պատիժ կսահմանի դատարանը: Նշենք, որ հունվարի 16-ին կայացած դատական նիստին դատախազը պահանջեց 6.5 տարվա ազատազրկման դատապարտել Վարդան Պետրոսյանին:
«Նմանատիպ դեպքերում ոչ ոք պատիժը մեկ-երկու տարուց ավելի չի կրում: Իմ փորձը ցույց է տալիս, որ նման կալանավորները համաներումով կամ վաղաժամկետ պայմանական ազատ են արձակվում: Իմ բոլոր վստահորդները պատիժը կրում են ազատ ռեժիմով»,- ավելացրեց փաստաբանը:
Նշենք, որ հունվարի 23-ին կայանալիք դատական նիստին պաշտպանական ճառով հանդես են գալու Վարդան Պետրոսյանի փաստաբանները:
Հիշեցնենք, որ ըստ մեղադրական եզրակացության՝ Վարդան Պետրոսյանը 2013թ. հոկտեմբերի 20-ին, ժամը 22:10–ի սահմաններում, Կոտայքի մարզի Սարալանջ գյուղի կողմից դեպի Երեւան ուղղությամբ վարելիս «ԲՄՎ-320» մակնիշի մեքենայով բախվել է «Վազ 21214» մակնիշի մեքենայի հետնամասին։ Վթարի հետեւանքով «Վազ-21214» մակնիշի մեքենայի ուղեւորներ Էդվարդ եւ Էդգար Հակոբյանները մահացել են, ուղեւորներ Տաթեւիկ Հակոբյանը, Հայկ Հակոբյանը, էմմա Հակոբյանը, ինչպես նաեւ վարորդ Արթուր Հակոբյանն ստացել են վնասվածքներ: Վարդան Պետրոսյանին մեղադրանք է առաջադրվել ՀՀ քրեական օրենսգրքի 242-րդ հոդվածի 3-րդ մասի հատկանիշներով՝ «Ճանապարհային երթեւեկության կամ տրանսպորտային միջոցների շահագործման կանոնները խախտելը, որն անզգուշությամբ առաջացրել է երկու կամ ավելի մարդու մահ»։ Տուժող կողմը փորձում է ապացուցել, որ Վարդան Պետրոսյանը վթարի պահին եղել է ալկոհոլի ազդեցության տակ եւ գերազանցել է թույլատրելի արագությունը։ Դերասանը հերքում է այդ վարկածը եւ իրեն հերթին փորձում է ապացուցել, որ տուժող կողմի մեքենան կայանած է եղել ոչ թե ճանապարհի կողնակին, այլ երթեւեկելի գոտում, ունեցել է անսարքություններ։




























