նախընտրելի դարձնելՉեխիայի նախագահ Միլոշ Զեմանը կոչ է արել «Իսլամական պետության» դեմ միջազգային ռազմական լայնածավալ գործողություն սկսել:
Ըստ նրա՝ միջազգային հանրությունը պետք է օպերատիվ արձագանքի սպառնալիքին, որը բխում է այդ ահաբեկչական կազմակերպությունից:
Հոլոքոստի զոհերի հիշատակին նվիրված հանդիպմանը ելույթ ունենալիս Զեմանը ընդգծել է, որ գործողությունը պետք է անցկացվի ՄԱԿ-ի հովանու ներքո:
«Անհրաժեշտ է ՄԱԿ-ի ԱԽ բոլոր անդամ պետությունների ստորաբաժանումների մասնակցությունը»,- Զեմանի խոսքերն է փոխանցում ՏԱՍՍ-ը:
Նախագահը ԻՊ-ից բխող սպառնալիքը համեմատել է մարդկության համար վտանգ ներկայացնող Երրորդ Ռեյխի հետ: Զեմանը հայտարարել է, որ ԻՊ-ը ձգտում է գրավել Եվրոպայի տարածքի կեսը, իսկ «նման ծրագրեր ուներ նաեւ Ադոլֆ Հիտլերը, եւ դրանք գրեթե իրականացել են»:
«Իսլամական ծայրահեղականները կարող են ողբերգության հեղինակ դառնալ, որի հետեւանքով կզոհվեն միլիոնավոր քաղաքացիներ», - կարծում է նախագահը: Նա հավելել է, որ այդ դեպքում մարդկությանը սպառնում է «սուպերհոլոքոստ»:
Զեմանը դատապարտել է միջազգային հանրության անվճռականությունը, որը, ըստ նրա, զերծ է մնում ԻՊ-ի դեմ ուժ կիրառելուց: Նա նշել է, որ ծայրահեղականների ճամբարներում գրոհայիններ են պատրաստվում ողջ աշխարհում զանգվածային ահաբեկչություններ իրականացնելու համար:
Ըստ Չեխիայի նախագահի՝ ԻՊ-ի դեմ գործողությունը կարող է իրականացվել ժամանակակից ռազմական տեխնիկայի օգտագործմամբ, այնպիսիք, ինչպիսիք են անօդաչու օդանավերը եւ ռոբոտացված այլ մեքենաներ, որոնք չեն պահանջում մարդու անմիջական մասնակցությունը ռազմական գործողություններում:
