նախընտրելի դարձնել
Նախագահական նստավայրի մոտ «Մանանա Գրեյն» ընկերության փոխտնօրենի մեքենայից 56 մլն դրամի գողությանն աջակցելու համար 5.6 տարվա ազատազրկման դատապարտված, HSBC բանկի նախկին աշխատակից Աշոտ Առուշանյանին արդարացնելու պահանջով արդեն 15-րդ օրը հացադուլ անող Առուշանյաններն այսօր՝ փետրվարի 3-ին, դադարեցրել են հացադուլը եւ իրենց բողոքի ակցիան շարունակելու են նստացույցով: Այս մասին NEWS.am-ի հետ զրույցում ասաց Աշոտ Առուշանյանի հայրը՝ Լավրենտի Առուշանյանը:
«Մենք քիչ առաջ նամակ ենք ուղարկել նախագահականի նամակների բաժին եւ տեղեկացրել ենք, որ մենք այսօրվանից դադարեցնում ենք հացադուլը եւ շարունակում ենք բողոքել նստացույցով: Մենք նաեւ գրել ենք, որ համաձայն չենք, որ նախագահը Վճռաբեկ դատարանի վճռից հետո մեզ ընդունի: Մենք պահանջում եւ խնդրում ենք, որ նախագահը մինչեւ Վճռաբեկի որոշումը ընդունի մեզ, որովհետեւ մենք վստահ ենք, որ նախագահը ամբողջ տեղեկատվությանը չի տիրապետում»,-ասաց նա:
Նրա խոսքով՝ գիշերը վատացել է իր կնոջ՝ Անահիտ Առուշանյանի ինքնազգացողությունը, նրան տեղափոխել են հիվանդանոց, այնուհետեւ տուն:
Լավրենտի Առուշանյանը նշեց, որ եթե նստացույցն էլ արդյունք չտա, իրենք շարունակելու են իրենց բողոքի ակցիաները, նույնիսկ դիմելու են ծայրահեղ միջոցների:
Նշենք, որ հունվարի 31-ին նախագահ Սերժ Սարգսյանը Սիրահարների այգում զրուցել էր Անահիտ Առուշանյանի հետ եւ խոստացել նրանց ընդունել Վճռաբեկ դատարանի որոշումից հետո:
Հիշեցնենք, որ Երեւանի Կենտրոն եւ Նորք-Մարաշ համայնքների ընդհանուր իրավասության դատարանն Աշոտ Առուշանյանին մեղավոր է ճանաչել ՀՀ քրեական օրենսգրքի 38-177-րդ հոդվածի 3-րդ մասով՝ դատապարտելով նրան 5 տարի 6 ամիս, Էդգար Կարաքեշիշյանին՝ 7 տարի 6 ամիս ազատազրկման։ Ըստ մեղադրական եզրակացության՝ Աշոտ Առուշանյանն օժանդակել էր խմբով առանձնապես խոշոր չափերի գողություն կատարելու դիտավորություն ունեցող իր ընկերներ Էդգար Կարաքեշիշյանին եւ ծանոթ Արտաշես Գալստյանին` նրանց տրամադրելով տեղեկատվություն առանձնապես խոշոր չափերի գումարի վերաբերյալ: Կասկածյալ Արտաշես Գալուստյանն նախաքննության ընթացքում ցուցմունք էր տվել, թե 2011թ. հունիսի սկզբին Օպերայի տարածքում գտնվող սրճարաններից մեկում ինքը, Էդգար Կարաքեշիշյանը եւ Աշոտ Առուշանյանը հանդիպել են, վերջինը Կարաքեշիշյանին է փոխանցել HSBC բանկի համակարգչային բազայից հանված մի թուղթ, որի վրա նշված է եղել տուժողի՝ «Մանանա Գրեյն» ՍՊԸ-ի տնօրենի կողմից տեղափոխված գումարի մասին եւ այլ տեղեկատվություն: Արտաշես Գալուստյանի նկատմամբ խափանման միջոց կալանքը դրանից հետո փոխվել էր, նա ազատ էր արձակվել եւ հաշված օրեր անց նրան հոր հետ գտել էին կախված վիճակում:
Առուշանյանը մեղավոր էր ճանաչվել ու դատապարտվել 5 ու կես տարվա ազատազրկման։ Վերաքննիչ դատարանն անփոփոխ էր թողել առաջին ատյանի դատարանի վճիռը: Աշոտ Առուշանյանը մինչեւ օրս պնդում է, որ մեղավոր չէ: Գործն այժմ Վճռաբեկ դատարանում է:
