նախընտրելի դարձնել
Մարտի 5-ի գիշերը սկսված ձյան տեղումների հնարավոր հետեւանքները կանխելու նպատակով մայրաքաղաքի վարչական շրջանների գլխավոր ու երկրորդական փողոցներում, այնուհետ նաեւ բակային տարածքներում իրականացվել են ձնամաքրման աշխատանքներ:
Քաղաքապետարանից հայտնում են, որ գործընթացը մեկնարկել է տեղումների առաջին իսկ ժամից` վարչական շրջանների սանմաքրման ձեռնարկությունների տեխնիկական ու մարդկային ռեսուրսների ներգրավմամբ: Լուսադեմին քաղաքի բոլոր գլխավոր ու երկրորդական փողոցները լիարժեք անցանելի են եղել: Մաքրման աշխատանքների նպատակով օգտագործվել է համապատասխան ծավալի տեխնիկական աղ եւ շլաքային ավազ: Ձնամաքրման աշխատանքներին միացել են նաեւ տնտեսվարող սուբյեկտները, որոնք, Երեւանի ավագանու ընդունած պարտադիր բարեկարգման նորմերի որոշման համաձայն, ձմեռային ամիսներին պարտավոր են մաքրել տնօրինած կառույցներին հարակից տարածքները:
Ձնամաքրումն այժմ համապատասխան ծառայությունների աշխատակիցների եւ համատիրությունների ուժերով ծավալվել է բակային տարածքներում ու հարակից աստիճանավանդակներում, մայթերում ու ներբակային ճանապարհներում:
Մայրաքաղաքի ձյան մաքրման աշխատանքները համակարգում են Երեւանի քաղաքապետարանի կոմունալ տնտեսության վարչությունն ու հատուկ օպերատիվ շտաբը, իսկ տեղերում`վարչական շրջանների ղեկավարները: Անհրաժեշտության դեպքում ձնամաքրումը կշարունակվի նաեւ օրվա երկրորդ կեսին:
