Կաշառք վերցնելու մեջ մեղադրվող, Նոր Նորքի զինկոմ Ռաֆայել Զախարյանը այսօր՝ մայիսի 12-ին, դատապարտվեց 3.5 տարվա ազատազրկման: Այս մասին NEWS.am-ի հետ զրույցում ասաց ամբաստանյալի փաստաբան Արմեն Խաչատրյանը՝ ավելացնելով, որ դատավճիռը դեռեւս չի ստացել եւ չի կարող ասել՝ դատարանի ոորոշումը հիմնավոր է, թե ոչ:

«Երբ դատավճիռը կստանանք, կտեսնենք, թե դատարանն ինչ հիմնավորումներ ու փաստարկներ է բերել, ըստ այդմ պարզ կլինի որոշումը մեզ գոհացնում է, թե ոչ»,- ասաց պաշտպանը: 

Նշենք, որ գործով դատախազն 9 տարվա ազատազրկում էր պահանջում:

Հիշեցնենք, որ ըստ մեղադրական եզրակացության՝ Ռաֆայել Զախարյանը 2014թ. մարտի 17-ին իր աշխատասենյակում, Երեւան քաղաքի Ավան 7 փող. 45 տան բնակիչ Գագիկ Վարդանյանից, որդու՝ Ալբերտ Վարդանյանի օգտին առողջական վիճակի բերումով պահեստազորում հաշվառելու, դրանով իսկ զինվորական ծառայության զորակոչից վերջնականապես ազատելու դիմաց պահանջել է առանձնապես խոշոր չափերով՝ 1.659.840 ՀՀ դրամին համարժեք 4000 ԱՄՆ դոլար կաշառք: Երկու օր անց Զախարյանը նույն զինկոմիսարիատի զորակոչային բաժանմունքի պետի աշխատասենյակում Գ.Վարդանյանից ստացել է 3900 ԱՄՆ դոլար:

Ռաֆայել Զախարյանին մեղադրանք է առաջադրվել Քրեական օրենսգրքի 311-րդ հոդվածի 4-րդ մասի 2-րդ կետով եւ 235-րդ հոդվածի 1-ին մասով:

Հիշեցնենք, որ կալանավորված Նոր-Նորքի զինվորական կոմիսար, գնդապետ Ռաֆայել Ռուբենի Զախարյանը Գարիկ Գաբրիելյանի՝ Գելի հորաքրոջ որդին է: