նախընտրելի դարձնել
«Նաիրիտ» գործարանի հարցով Համաշխարհային բանկի մասնագետների ֆինանսատեխնիկական եզրակացությունը հանրությանը կներկայացվի մինչեւ մայիսի վերջ։ Այս մասին մայիսի 13-ին լրագրողներին հայտնել է ՀՀ էներգետիկայի եւ բնական ռեսուրսների նախարար Երվանդ Զախարյանը։
Նախարարը հիշեցրել է, որ 2009թ. մարտից գործարանը չի աշխատել եւ հսկայական պարտքեր է կուտակել ԱՊՀ Միջպետական բանկի առաջ։ Եվս 5.5 մլրդ դրամ կազմել են ավելի քան 2400 աշխատակիցների պարտքերը, իսկ 6 մլրդ դրամ՝ հարկերի եւ այլ վճարումների պարտքերը։
2014թ. նոյեմբերին գործարանը ստիպված էր կրճատել 1900 աշխատակիցների։ Նախկինում գործարանը աշխատավարձ էր վճարում պետական էներգետիկ ընկերությունների եկամուտներից, սակայն անորոշ ժամկետով նման քաղաքականություն շարունակելը հնարավոր չէր։ «Հիմա գործարանն ունի 480 աշխատակից, որոնք ապահովում են անվտանգությունն ու վերահսկողությունը»,- նշեց նախարարը։
Հիշեցնենք, որ 2006թ. պետությունը «Նաիրիտի» բաժնեմասերի 90 տոկոսը վաճառել էր բրիտանական Rhinoville Property Limited կոնսորցիումին։ ԱՊՀ Միջպետական բանկը 2006-ին Rhinoville Property Limited ընկերության համար 70 միլիոն դոլարի բանկային գիծ էր բացել, որը ընկերությունը չէր փակել։ Մոսկվայի արբիտրաժային դատարանը 2014թ. հունվարին բավարարել էր Միջպետական բանկի մասին հայցը` հայկական «Նաիրիտ» գործարանի սեփականատիրոջից պարտքեր դիմաց 90 տոկոս բաժնեմասերը բռնագրավելու հայցը։ Մնացած 10 տոկոսը պատկանում է ՀՀ կառավարությանը։
