նախընտրելի դարձնել
Երեւանի քննչական վարչության Կենտրոն եւ Նորք-Մարաշ վարչական շրջանների քննչական բաժնում հարուցվել է քրեական գործ՝ «Սանիտեկ» ՍՊԸ-ի հայաստանյան մասնաճյուղին առանձնապես խոշոր չափի գույքային վնաս պատճառելու դեպքի առթիվ։
ՀՀ Քննչական կոմիտեից հայտնում են, որ ՀՀ Ոստիկանության Կենտրոնական բաժնից հունիսի 28-ին Կենտրոն եւ Նորք-Մարաշ վարչական շրջանների քննչական բաժնում ստացվել են «Սանիտեկ» ՍՊԸ-ին գույքային վնաս պատճառելու վերաբերյալ ընկերության ներկայացուցիչ Ա.Կարապետյանի հաղորդման հիման վրա նախապատրաստված նյութերը։
ՍՊԸ-ի ներկայացուցիչը, մասնավորապես, գրավոր հաղորդում է ներկայացրել առ այն, որ 2015 թվականի հունիսի 23-ին անհայտ անձը կամ անձինք տարհանել եւ Երեւան քաղաքի Բաղրամյան պողոտա են տեղափոխել Երեւան քաղաքի Կենտրոն վարչական շրջանի տարբեր փողոցներում տեղադրված, «Սանիտեկ» ՍՊԸ-ի հայաստանյան մասնաճյուղին պատկանող թվով 41 աղբամանները, դրանք օգտագործել որպես արգելապատնեշ միջոցներ` այդպիսով ընկերությանը պատճառելով առանձնապես խոշոր չափի գույքային վնաս:
Նկատի ունենալով, որ նյութերում առկա են քրեական գործ հարուցելու՝ օրենքով նախատեսված առիթ՝ Կենտրոն եւ Նորք-Մարաշ վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 185-րդ հոդվածի 3-րդ մասի 1-ին կետով (ուրիշի գույքի դիտավորյալ ոչնչացում, որը պատճառել է առանձնապես խոշոր չափերի վնաս)։
Քրեական գործով որոշում է կայացվել առգրավել Երեւան քաղաքի Բաղրամյան փողոցում գտնվող եւ որպես արգելապատնեշ օգտագործվող, նշված ընկերությանը պատկանող 41 հատ աղբամանները։
Որոշման կատարումը հանձնարարվել է ոստիկանության համապատասխան ստորաբաժանումներին։
Նշենք, որ այսօր՝ հունիսի 29-ի առավոտյան ոստիկանությունը փորձել է առգրավել աղբամանները, սակայն ցուցարարները շարքով նստեցին աղբամանների դիմաց եւ թույլ չտվեցին առգրավել դրանք: Ոստիկանությունը հեռացավ:
