նախընտրելի դարձնելՀՀ միգրացիոն պետական ծառայության պետ Գագիկ Եգանյանը ՀՀ տարածքային կառավարման նախարարին կից կոլեգիայի այսօրվա նիստում ներկայացրել է ՀՀ միգրացիայի պետական կարգավորման քաղաքականության հայեցակարգի նախագիծը:
Տարածքային կառավարման նախարարության մամուլի ծառայությունից NEWS.am-ին հայտնում են, որ փաստաթուղթն անդրադառնում է ՀՀ միգրացիոն իրավիճակին, միգրացիայի պետական կարգավորման քաղաքականության նպատակին ու սկզբունքներին, միգրացիայի պետական կարգավորման քաղաքականության հիմնախնդիրներին, դրանց լուծման հիմնորոշ ուղղություններին: ՀՀ կառավարության գործունեության ծրագրի համաձայն` փաստաթուղթը դեկտեմբերին պետք է ներկայացվի կառավարություն: Գ. Եգանյանը տեղեկացրել է նաեւ, որ նախագիծը փորձաքննության կենթարկվի միգրացիայի ոլորտում Եվրամիության ընդունված չափորոշիչներին համապատասխանության տեսակետից: Այս նպատակով կհրավիրվի միջազգային փորձագետ` Եվրամիության TAIEX ծրագրի շրջանակում:
Փաստաթուղթն ընդունվել է ի գիտություն եւ որոշվել ուղարկել շահագրգիռ կազմակերպություններին` առաջարկություններ ստանալու համար:
Բացի այդ, նույն նիստում ՏԿՆ աշխատակազմի տեղական ինքնակառավարման վարչության պետ Աշոտ Գիլոյանը ներկայացրել է ՀՀ բազմաբնակարան բնակարանային ֆոնդի կառավարման եւ շահագործման ոլորտի բարեփոխումների 5-ամյա ծրագրի մշակման նպատակով նախատեսվող աշխատանքները:
Բարեփոխումների ծրագրի մշակման նպատակով ՀՀ վարչապետի որոշմամբ ստեղծվել է միջգերատեսչական աշխատանքային խումբ: Նախատեսվում է ծրագրի նախագիծը ՀՀ կառավարության քննարկմանը ներկայացնել 6 ամիս հետո: Բարեփոխումների ծրագրի մշակման համար աշխատանքային խումբը կհիմնվի արդեն առկա մի շարք փաստաթղթերի վրա, այդ թվում`
ՀԲ-ի անկախ փորձագետի կողմից ՀՀ կառավարությանը ներկայացված «Հայաստան. Բազմաբնակարան բնակֆոնդի վերանորոգումը եւ պաշտպանությունը» առաջարկությունների փաթեթի վրա:
