Եգիպտոսի Ալեքսանդրիա նահանգի իշխանությունները  նոյեմբերի 4-ին արտակարգ իրավիճակ են հայտարարել՝ կապված հորդառատ անձրեւների հետ, որոնք արդեն երկրորդ օրն է՝ չեն դադարում։   Ջրի տակ է անցել մի քանի բնակավայր, այդ թվում նաեւ՝ երկրի հյուսիսային մայրաքաղաքը՝ Ալեքսանդրիան։  

Քաղաքի առանձին շրջաններում ջրի մակարդակը բարձրացել է մինչեւ մեկ մետր, ջրի տակ են անցել խճուղիներ, արգելափակվել է մեքենաների անցումը շատ թունելներով եւ ավտոմայրուղիներով։  Ջրի տակ է մնացել նաեւ բազմակիլոմետրանոց առափնյա տարածքը։  Քաղաքում ծանր իրավիճակը բարդանում է նաեւ նրանով,  որ ջրթափ ուղիների մեծամասնությունը խցանվել է աղբով եւ կեղտով։  Մի քանի շրջանում   էլեկտրամատակարարումը դադարել է էլեկտրամալուխների կտրվելու եւ ենթակայանում հրդեհի պատճառով։ Նավահանգիստն արդեն երկրորդ օրը փակ է։  Իրավիճակի վերահսկման համար օպերատիվ շտաբ է ստեղծվել, տեղեկացնում է ՏԱՍՍ-ը։ 

Ալեքսանդրիայի մերձակայքում՝ Բուրգ-ալ-Արաբում եւ Էլ-Ամարիայում արտադրական ձեռնարկությունները դադարեցրել են աշխատանքը։  Իշխանությունները վախենում են հոկտեմբերի 25-ի իրավիճակի կրկնությունից, երբ վատ եղանակի պատճառով հյուսիսային մայրաքաղաքում ութ մարդ էր զոհվել, այդ թվում նաեւ՝ երկու երեխա։  

Անբարենպաստ իրավիճակը պահպանվում է Վադի-էն-Նատրուն դաշտավայրից դեպի հարավ ընկած տարածքում, որը Բուհայրա նահանգում է։  Անցյալ գիշեր ցածրադիր մի ամբողջ գյուղ է մնացել ջրի տակ։ Քաղպաշտպանության ուժերը կարողացել են աղետի վայրից հանել   72 մարդու։ Տուժածներ չկան։

Իսկ օդերեւութաբանների կանխատեսումները  հուսադրող չեն։ Մոտ օրերս երկրի ամբողջ տարածքում սպասվում է ջերմաստիճանի նվազում եւ հորդառատ անձրեւներ։