2014-ին  պետական ծրագրերով  Հայաստան է բերվել բելառուսական   250 տրակտոր եւ 150 միավոր այլ գյուղտեխնիկա: Այդ մասին փետրվարի  19-ին Երեւանում  Հայաստանի էկոնոմիկայի նախարար Կարեն Ճշմարիտյանի հետ հայ-բելառուսական միջկառավարական հանձնաժողովի նիստի արդյունքներն ամփոփող ճեպազրույցին հայտնել է Բելառուսի անտառտնտեսության նախարար Միխայիլ Ամելյանովիչը:  

Բելառուսի եւ Հայաստանի միջեւ հարաբերությունները դինամիկ զարգանում են,  հեռանկարում մի շարք  որոշումներ կան: Բանակցություններ են վարվում գյուղատնտեսության վերաբերյալ համաձայնագրերը մի քանի տարով երկարաձգելու, ինչպես նաեւ   պարարտանյութի մատակարարման վերաբերյալ (դրանց արտադրողը   «Բելառուսկալի» ԲԲԸ-ն Բելառուսի խոշորագույն ձեռնարկություններից է. խմբ.):

«Մենք խոսում ենք Հայաստանի լեռնային հանքարդյունաբերության մեջ Բելազ ապրանքանիշի մեր քարհանքային ինքաթափ բեռնատարների օգտագործման մասին:  Որակով դրանք չեն զիջում համաշխարհային ստանդարտներին, իսկ գինն այսօր ավելի ցածր է», - ասել է նախարարը:

Բելառուսական կողմը ողջունում է նաեւ հայկական արտադրանքի առաքումները` կոնյակի սպիրտների, գինու, գյուղատնտեսական արտադրանքի:  «Կարծում եմ, Հայաստանից մատակարարումների ծավալներն ամեն տարի կավելանան», - ամփոփել է նա: