ՀՀ քննչական կոմիտեի Երեւան քաղաքի Կենտրոն եւ Նորք-Մարաշ վարչական շրջանների քննչական բաժնում քննվող քրեական գործով  ձեռնարկված քննչական գործողությունների արդյունքում պարզվել են  Երեւան քաղաքում ապրիլի 25-ին տաքսու վարորդի նկատմամբ տեղի ունեցած ավազակային հարձակման մի շարք հանգամանքներ, առերեւույթ հանցագործություն կատարած անձի ինքնությունը:

ՀՀ Քննչական կոմիտեից NEWS.am-ին հայտնում են, որ 2016 թվականի ապրիլի 25-ին  քաղաքացի Դ.Մանուկյանից հաղորդում է ստացվել, որ երկու անծանոթ երիտասարդ նստել են իր կողմից որպես տաքսի վարվող ավտոմեքենան եւ դանակի սպառնալիքով գումար հափշտակել:

Դեպքի առթիվ Երեւան քաղաքի Կենտրոն եւ Նորք-Մարաշ վարչական շրջանների քննչական բաժնում հարուցվել է քրեական գործ՝ ՀՀ քրեական օրենսգրքի 175-րդ հոդվածի 2-րդ մասի 1-ին եւ 4-րդ կետերի հատկանիշներով, մշակվել քննչական պլան եւ ձեռնարկվել անհետաձգելի քննչական գործողություններ՝ դեպքի հանգամանքները պարզելու ուղղությամբ։

Նախնական քննության տվյալներով՝ 2016 թվականի ապրիլի 25-ին՝ ժամը 01:40-ի սահմաններում, Երեւանի Արշակունյաց պողոտայում երեք երիտասարդ կանգնեցրել են Դ. Մանուկյանի կողմից որպես տաքսի վարվող «Օպել Աստրա» մակնիշի ավտոմեքենան՝ «Էրեբունի» ԲԿ տեղափոխվելու մտադրությամբ: Հասնելով նշված վայր՝ երիտասարդներն իջել են ավտոմեքենայից, որից հետո նրանցից մեկը հեռացել է, իսկ երկուսը կրկին  նստել են ավտոմեքենան եւ վարորդին խնդրել շարունակել ճանապարհը դեպի Մաշտոցի պողոտա, ապա՝ Կողբացի փողոց: Պահանջված վայրում  ավտոմեքենան կանգնեցնելուց հետո՝ վարորդի կողքին նստած երիտասարդը դանակի գործադրման սպառնալիքով գումար է պահանջել, այնուհետեւ նրա գրպանից հանել գումարը եւ դիմել փախուստի:

Քննությամբ ձեռնարկված միջոցառումների արդյունքում պարզվել է առերեւույթ հանցագործություն կատարած անձի ինքնությունը, ում տուժողը ճանաչել է՝ օրենքով սահմանված կարգով իրականացված համապատասխան քննչական գործողության ժամանակ։

Ձեռք բերված ապացույցների հիման վրա՝ երիտասարդին մեղադրանք է առաջադրվել՝ տաքսու վարորդի նկատմամբ ավազակային հարձակում կատարելու համար։ Քննիչը միջնորդություն է ներկայացրել դատարան՝ մեղադրյալի նկատմամբ որպես խափանման միջոց կալանավորումը կիրառելու մասին, ինչը բավարարվել է։

Քրեական գործի նախաքննությունը շարունակվում է: