Բեռլինի խիզախությունը թույլ չի տալիս մոռանալ հայերի ողբերգության մասին: Դրանից հետո Թուրքիայի կառավարությունը չի կարող շարունակել հերքել Հայոց ցեղասպանությունը: Սակայն ես անհամբերությամբ սպասում եմ հաջորդ քայլին, իտալական Corriere della Sera պարբերականին ասել է կանադահայ ռեժիսոր Ատոմ Էգոյանը:

Ի՞նչ եք կարծում Բունդեսթագի բանաձեւի մասին:

Գերմանիան ապացուցեց իր բարձր բարոյական հեղինակությունը՝ ցույց տալով, որ կարող է համակերպվել իր պատմության մութ էջերի հետ: Գերմանիան Օսմանյան կայսրության դաշնակիցն էր, եւ վկայություններ կան, որ նա տեղյակ էր  Հայոց ցեղասպանության պլանների մասին: Գերմանացիները թուրքերից սովորեցին, որ պատերազմի քողի տակ կարելի է նման հանցագործություններ կատարել:

Գերմանիան առավել, քան երբեւէ, Թուրքիայի հետ լավ հարաբերությունների կարիքն ունի միգրացիոն հոսքի պատճառով: Սակայն նա կատարեց իր սխալներն ընդունելու բարոյական ընտրությունը:

Այդ ողբերգության հետքը կա Ձեր կյանքի եւ ստեղծագործության վրա:

Դա ցավ է, որը միշտ ուղեկցում է: Բայց մենք ապրել ենք մինչեւ այս օրը այդ թվում հայ մտավորականների ջանքերի շնորհիվ, որը վառ է պահել կենդանի հիշատակը, երբ ամբողջ աշխարհն անտարբեր էր թվում:

Հիմա նախկին ԽՍՀՄ-ը ճանաչել է Ստալինի հանցագործությունները, ճապոնացիները խոսում են Նանջինգի ջարդի մասին: Գերմանացիների որոշումը հիմնարար հանգույց է:

Թուրքիայում ինչ-որ բան է փոխվում...

Կան կազմակերպություններ, եւ անգամ առանձին համարձակ քաղաքացիներ, որոնք այլեւս չեն ուզում աչք փակել: Անցյալ ամռանը ես Թուրքիայում էի: Փոփոխությունները տպավորիչ էին: 10 տարի առաջ այդ մասին հնարավոր չէր լինի անգամ խոսել:

Ու՞մ հետ կուզեիք անցկացնել այդ օրը:

Տատիկիս: Նա ցեղասպանությունից հետո որբացել էր:  «Արարատ» ֆիլմի գլխավոր երգ՝ «Երազը», նրան էր նվիրված: Ես ուզում էի, որ նա, որտեղ էլ որ լիներ, տեսներ, թե ուր ենք մենք հասել:

Նա անգամ չգիտեր, թե որտեղ է ծնվել, եւ ովքեր են իր ծնողները: Ես կուզեի, որ նա իմանար, որ իր պատմությունը մինչեւ  հիմա կենդանի է: