Հայաստանի ՀՆԱ 10–տոկոսանոց աճի մասին հայտարարությունը ոչ մի կապ չունի իրականության հետ. տնտեսագետ

Հայաստանի եւ Ռուսաստանի նախագահների հանդիպման ժամանակ արված Հայաստանի ՀՆԱ 10–տոկոսանոց աճի  մասին հայտարարությունները ոչ մի  կապ չունեն իրականության հետ։ Այս մասին օգոստոսի 15-ին կայացած մամուլի ասուլիսին ասել է տնտեսագետ Վարդան Բոստանջյանը։

Նրա խոսքով՝ այդ թիվը «հաճելի մոլորության մեջ է գցել» ինչպես ռուս, այնպես էլ հայ մասնագետներին։  «Դա չի խոսում այն մասին, որ նախագահները չեն տիրապետում վիճակագրական տվյալներին։ Դա ցույց է տալիս, որ նրանքպարզապես թքած ունեն այդ թվերի վրա։ Կարող էին ասել 20 տոկոս, 30 տոկոս, դա ոչ մի նշանակություն չէր ունենա»,– ընդգծել է Բոստանջյանը։

Ըստ տնտեսագետի՝ այդ հայտարարությունը նշան է այն բանի, որ նախագահներն ուզում են դա։ «Նրանք պարզապես տնտեսական թվերի հետ կապված ուրիշ ասելու բան չունեին»,– ասել է Բոստանջյանը։

Հիշեցնենք, որ օգոստոսի 10-ին՝ Հայաստանի եւ Ռուսաստանի նախագահների հանդիպման ժամանակ, Վլադիմիր Պուտինը գոհունակություն էր հայտնել ԵՏՄ անդամակցությունից հետո Հայաստանի գրանցած 10–տոկոսանոց ՀՆԱ աճի կապակցությամբ։