Արագածոտնի մարզում օրեր առաջ նռնակը ձեռքի մեջ պայթեցնելով ինքնասպանություն գործած տղամարդը Կոշ գյուղի 40-ամյա բնակիչ Շավարշ Մամիկոնյանն էր:

Կոշի գյուղապետ Աշոտ Ենգիբարյանը NEWS.am-ի հետ զրույցում ասաց, որ տղամարդը պայթեցրել է նռնակը այն տան բակում, որտեղ բնակվում էր:

«Խաչվերացի տոնն էր դե, այցելում են տներ, մի երկու բաժակ խմախ է եղել: Ինձ զանգեց կինը, ասեց, որ Երեւանում է, որ ամուսինը սպառնում է նռնակ պայթեցնել»,- ասաց գյուղապետը` նշելով, որ երկու ժամ ոստիկանները տղամարդուն համոզել են նռնակը չպայթեցնել, սակայն ապարդյուն,- «Իր մայրը գյուղի մյուս մասում է ապրում, մինչեւ ես գնացի, որ բերեմ նրան, համոզի, արդեն պայթեցրել էր նռնակը»:

Գյուղապետը նշեց, որ դրդապատճառների մասին իրենք տեղյակ չեն, տղամարդը նախկինում իր վարքով չի առանձնացել:

Տղամարդը նախքան մահանալն ասել է, որ այդ եւ եւս 6 նռնակները իրեն մնացել են պատերզմի տարիներից, երբ ծառայել է պաշտպանության բանակում: