նախընտրելի դարձնելՊետական եկամուտների կոմիտեն կատարելագործում է արտաքին տնտեսական գործունեության «Ազգային մեկ պատուհան» պորտալը:
ՊԵԿ-ից NEWS.am-ին հայտնում են, որ ներդրվող նոր ծառայությունները ներմուծում եւ արտահանում կատարողներին թույլ են տալիս պետության հետ փոխհարաբերվել բացառապես էլեկտրոնային եղանակով, հետեւաբար բարձր արդյունավետությամբ եւ ժամանակի տնտեսմամբ։ «Բիզնեսը կամ ֆիզիկական անձը, մեկ անգամ տեղեկատվություն ներկայացնելով պետական որեւէ մարմնի, այլեւս կարիք չունի այն տրամադրելու մեկ այլ գերատեսչության։ «Ազգային մեկ պատուհան» պլատֆորմում ներառված արտաքին տնտեսական գործունեություն իրականացնողները, մաքսային մարմինը, ապահովագրական կազմակերպությունները, բրոքերները, միջնորդները, բանկերը, սննդամթերքի անվտանգության պետական ծառայությունը, առողջապահության նախարարությունը եւ իրավասու այլ մարմինները շփվում են բացառապես էլեկտրոնային լեզվով՝ միմյանց փոխանցելով ստացված տեղեկատվությունը»,-նշում է ՊԵԿ տեղեկատվական տեխնոլոգիաների վարչության պետ Միքայել Փաշայանը։
Առաջիկայում ավարտվելու է Բագրատաշեն, Բավրա եւ Գոգավան մաքսակետերը միջազգային չափանիշներին համապատասխան արդիականացնելու ծրագիրը, որին հաջորդելու է էլեկտրոնային ծառայությունների գործարկումը՝ «Մեկ կանգառ, մեկ պատուհան» սկզբունքի համաձայն: Այն թույլ կտա հետագայում նաեւ հարեւան պետությունների՝ Վրաստանի, Իրանի հետ փոխանակել տեղեկատվություն՝ ներմուծման եւ արտահանման գործընթացն արագ կազմակերպելու համար: «Նոր մաքսակետերում բեռնատարների ու ֆիզիկական անձանց համար տարանջատված գործընթացներ են գործելու: Բացի այդ, ֆիզիկական անձանց համար մեկ վայրում են կենտրոնանալու բոլոր ծառայությունները՝ անձնագրային, մաքսային, բանկային, բրոքերային: Զբոսաշրջիկները երկրի մասին առաջին տպավորությունը ձեւավորելու են սահմանին՝ տեսնելով միջազգային չափանիշներին համապատասխանող պայմանները»,-վստահեցնում է Մ. Փաշայանը:
«Մեկ կանգառ, մեկ պատուհան» սկզբունքը մշակված է միջազգային չափանիշներով ու համապատասխանեցված է ոչ միայն ՀՀ օրենսդրությանը, այլեւ ԵԱՏՄ պահանջներին: Միության շրջանակում ՀՀ մաքսային մարմնի ստանձնած պարտավորությունների համաձայն՝ ՊԵԿ-ը մշակել է մաքսային արժեքի որոշման էլեկտրոնային ծառայություն: ԵԱՏՄ անդամ չհանդիսացող պետության տարածքով ապրանք ներկրելիս տարանցման հայտարարագիր ներկայացնելու գործընթացն էլեկտրոնային հարթակ է տեղափոխվել: Նույնը վերաբերում է նաեւ արտաքին տնտեսական գործունեության վերաբերյալ ներկայացվող վիճակագրական հայտարարագրին ու վճարման ապահովմանը:
Տեղեկատվական տեխնոլոգիաների վարչության պետն ընդգծում է տարբեր գերատեսչությունների միջեւ տեղեկատվության փոխանակման շնորհիվ երկակի հսկողության կարգավորման կարեւորությունը. «Եթե նախկինում ներմուծված դեղերն անցնում էին կարմիր ուղիով, այսինքն՝ նախ նմուշներ էին ուղարկվում առողջապահության նախարարություն, եւ այնտեղից ստացված հավաստագիրը մաքսային մարմնին տրամադրելուց հետո միայն կատարվում էր ապրանքի բացթողում, ապա այսօր բիզնեսի առօրյան բարդացնող գործընթացները վերացել են. անհրաժեշտ փաստաթղթերի փոխանակումը կատարվում է էլեկտրոնային եղանակով եւ բիզնես-ՊԵԿ-ԱՆ շղթայում՝ միաժամանակյա շփմամբ: Նմանատիպ սկզբունքով է մշակվել նաեւ ՀՀ ԳՆ սննդամթերքի անվտանգության պետական ծառայության հավաստագրի ստացման համակարգը»: «Ազգային մեկ պատուհան» պորտալում կյանքի է կոչվել նաեւ ապրանքների դասակարգման նախնական որոշումների համակարգը, որի միջոցով ԱՏԳ մասնակիցները հնարավորություն ունեն էլեկտրոնային եղանակով դիմելու մաքսային մարմնին` որոշելու արտահանվող եւ ներմուծվող ապրանքների համապատասխանությունն արտաքին տնտեսական գործունեության ապրանքային անվանացանկին: Արդեն գործող ծառայությունների կողքին փորձարկվում են նորերը: Միքայել Փաշայանի տեղեկացմամբ, «Մեկ կանգառ, մեկ պատուհան» համակարգը շարունակաբար կատարելագործվելու է, ներդրվելու են նոր ծառայություններ՝ արտաքին տնտեսական գործունեությունը դյուրացնելու եւ խթանելու նպատակով:
