նախընտրելի դարձնելԵրեւանի Էրեբունի եւ Նուբարաշեն վարչական շրջանների ընդհանուր իրավասության դատարանում այսօր` նոյեմբերի 8-ին, «Երրորդմասցի Լյովիկի» եւ երկու ընկերների սպանության գործով նիստին սկսվել է տեսաձայնագրությունների սկավառակների հետազոտության փուլը: Հետազոտվել է լուսանկարով չորս անձի վկային ճանաչման ներկայացնելու քննչական գործողության տեսաձայնագրությունը, որն արվել է IPhone-6 սմարթֆոնով: Տեսաձայնագրությունը դատարանում ցուցադրվել է համակարգչով, սակայն, համակարգչի անսարք լինելու պատճառով դատարանը հետաձգել է նիստը:
Հաջորդ դատական նիստը տեղի կունենա նոյեմբերի 15-ը:
Ըստ մեղադրական եզրակացության` Վահան Հակոբյանը («Գաստիկ»), Սարգիս Հախանումյանն («Տլե») ու Սարգիս Գրիգորյանը նախնական համաձայնությամբ ապօրինի ձեռք են բերել եւ պահել զենք:
2015թ. մարտի 4-ին ժամը 13:50-ի սահմաններում Վահան Հակոբյանը, Սարգիս Հախանումյանը եւ Սարգիս Գրիգորյանը («Ծգլ») նախնական համաձայնությամբ, շատերի կյանքի համար վտանգավոր եղանակով, երկու եւ ավելի անձանց ապօրինաբար կյանքից զրկելու դիտավորությամբ, իրենց մոտ ապօրինի պահվող մարտական ակոսափող հրազեն հանդիսացող թվով 3 ինքնաձիգներից կրակահերթ են արձակել Լեւոն Ղազարյանի, Դրաստամատ Թադեւոսյանի եւ Մեսրոպ Նազարյանցի ուղղությամբ: Կրակոցների հետեւանքով ստացված հրազենային վնասվածքներից Մ.Նազարյանցը տեղում, իսկ Լ.Ղազարյանն ու Դ.Թադեւոսյանը «Էրեբունի» բժշկական կենտրոն տեղափոխվելու ճանապարհին մահացել են:
Նրանց մեղադրանք է առաջադրվել Քրեական օրենսգրքի 104-րդ հոդվածի 2-րդ մասի 1, 6, 7 կետերով: Խափանման միջոց է ընտրվել կալանավորումը:
