նախընտրելի դարձնելԵրեւանի «Շենգավիթ» բժշկական կենտրոնում անցած տարվա հուլիսին ծննդկան Նաիրա Աբգարյանի մահվան գործով նշանակված դատաբժշկական հանձնաժողովային փորձաքննության եզրակացությունը ստացվել է: Այս մասին NEWS.am-ին ասաց մահացած ծննդկանի քույրը՝ տուժողի իրավահաջորդ Նառա Աբգարյանը՝ նշելով, որ տուժողի իրավահաջորդի ներկայացուցչի միջնորդությամբ ինքը մասնակցել է հանձնաժողովային փուլին:
«Հանձնաժողովային փուլին մասնակցելու նպատակն է եղել գործընթացին անձամբ հետեւելը եւ փորձել հասկանալ իրողությունը: Քննիչի եւ մեր կողմից դատաբժշկական հանձնաժողովին ներկայացված որոշակի հարցերին տրվել են հստակ պատասխաններ, իսկ ստացված եզրակացության հետ որոշակի հանգամանքների շուրջ հստակ պատասխաններ ստանալու համար ներկայացուցչի կողմից կներկայացվեն համապատասխան միջնորդություններ»,- ասաց քույրը:
Նառա Աբգարյանը նշեց նաեւ, որ քույրը ոչ մի հիվանդություն չի ունեցել, որը կարող էր պատճառահետեւանքային կապի մեջ լիներ մահվան հետ. «Ծանոթանալով փորձաքննության եզրակացության բժշկական փաստաթղթերի տվյալներ բաժնին` նկատել ենք հակասություններ տուժողի իրավահաջորդի եւ նշված փաստաթղթերում արձանագրված տվյալների միջեւ, որի հետ կապված մոտ օրերս մեր ներկայացուցիչը միջնորդություններ կներկայացնի վարույթն իրականացնող մարմնին: Ցավոք նախաաքննությունը քանի որ դեռ ընթացքի մեջ է, մանրամասն տեղեկություններ տրամադրել չենք կարող: Գործի հետ կապված մանրամասներ կտրամադրենք նախաքննության ավարտից հետո»:
Նշենք, որ վիրահատությունը կատարել է Աշոտ Սիրունյանը: Հիշեցնենք, որ 44-ամյա Նաիրա Աբգարյանը կեսարյան հատումով զույգ էր ունեցել 2016թ. հուլիսի 21-ին մայրաքաղաքի «Շենգավիթ» բժշկական կենտրոնում, վիրահատությունը նորմալ էր անցել, ժամեր անց, սակայն, վիճակը կտրուկ վատացել էր, արյունահոսություն էր սկսվել: Ծննդկանը տեղափոխվել էր բազմապրոֆիլային հիվանդանոց, որտեղ էլ մահացել էր: Դեպքի առթիվ հարուցվել է քրեական գործ: Նախաքննությունը շարունակվում է:
