նախընտրելի դարձնել
Ամենայն հայոց կաթողիկոս Գարեգին Բ-ն այսօր՝ մայիսի 28-ին, Մայր Աթոռ Սուրբ Էջմիածնում ընդունեց «Ավրորա» մրցանակաբաշխության առիթով Հայաստան ժամանած Հունաստանի Ալեքսանդրուպոլի միտրոպոլիտ Անթիմոս Կուկուրիդեսին եւ առաջնորդարանի դիվանապետ Իրենեոս վարդապետ Լավցիսին՝ ուղեկցությամբ Հունաստանի հայոց թեմի առաջնորդական տեղապահ Հոգեշնորհ Տ. Խորեն վարդապետ Առաքելյանի:
Մայր աթոռի տեղեկատվական համակարգից NEWS.am-ին հայտնում են, որ Նորին Սրբությունը, ուրախություն հայտնելով Հույն Ուղղափառ Եկեղեցու բարձրաստիճան հոգեւորականների այցի առիթով, կարեւորեց դարերի ընթացքում հայ եւ հույն ժողովուրդների, ինչպես նաեւ երկու Եկեղեցիների միջեւ ձեւավորված ջերմ փոխհարաբերություններն ու սերտ գործակցությունը: Իր հերթին Ալեքսանդրուպոլի միտրոպոլիտը Ամենայն Հայոց Կաթողիկոսին փոխանցեց Հունաստանի Հերոնիմոս Բ Արքեպիսկոպոսի ջերմ ողջույնները։ Անթիմոս միտրոպոլիտն իր խոսքում ուրախությամբ ընդգծեց, որ հունահայ համայնքն իր ակտիվ գործունեությամբ կարեւոր ներդնում ունի Հունաստանի զարգացման ու բարգավաճման գործում: Վերջինս նաեւ խոսեց հայ եւ հույն ժողովուրդների պատմության ծանր ժամանակաշրջանների մասին՝ գոհունակությամբ արձանագրելով, որ, հակառակ բոլոր փորձությունների, այսօր երկու ժողովուրդները շարունակում են կերտել իրենց խաղաղ ու բարօր կյանքը։
Հանդիպման վերջում Ամենայն Հայոց Կաթողիկոսը, իր օրնությունն ու բարեմաղթանքները բերելով հոգեւոր այրերին, նաեւ եղբայրական ողջույններ փոխանցեց Հունաստանի Արքեպիսկոպոսին:
Հանդիպմանը ներկա էին Մայր Աթոռի Միջեկեղեցական հարաբերությունների բաժնի պատասխանատու Հոգեշնորհ Տ. Շահե ծայրագույն վարդապետ Անանյանը եւ Բուլղարիայի հայոց թեմի առաջնորդ Հոգեշնորհ Տ. Իսահակ վարդապետ Պողոսյանը:
