Երևան քաղաքի ընդհանուր իրավասության դատարանի դատավոր Դ.Գրիգորյանը բավարարելով փաստաբան Միհրան Պողոսյանի միջնորդությունը ընդունել է պատշաճ փաստաթուղթ: Այս մասին իր ֆեյսբուքյան էջում գրել է փաստաբան  Էրիկ Ալեքսանյանը՝ անդրադառնալով Յուրի Խաչատուրովի սահմանահատման արգելքի վերաբերյալ ոստիկանության տարածած պարզաբանմանը։

«Քիչ առաջ մամուլից տեղեկացա, որ ՀՀ ոստիկանությունը հաղորդագրություն է տարածել այն մասին, որ Յուրի Խաչատուրովի ելքը չի թույլատրվել այն պատճառաբանությամբ, որ առկա չի եղել վարույթ իրականցնող մարմնի պատշաճ դատավարական փաստաթղթով՝ որոշմամբ ձևակերպված թույլտվություն և մեջբերելով ՀՀ քր. դատ. օր-ի143-րդ հոդվածի 6-րդ մասը ՀՀ ոստիկանությունը նշել է, որ դատարանը պարտավոր է եղել Յուրի Խաչատուրովի ՀՀ սահմանը հատելու թույլտվությունը տալ որոշում կայացնելով:

Նշված հարցի վերաբերյալ ցանկանում եմ ներկայցնել իմ մեկնաբանությունը:

ՀՀ քր. դատ. օր-ի 102-րդ հոդվածի 3-րդ մասի համաձայն. Միջնորդության և պահանջի վերաբերյալ ընդունված որոշումները պետք է լինեն պատճառաբանված: Միջնորդության կամ պահանջի վերաբերյալ ընդունված որոշման մասին քրեական վարույթն իրականացնող մարմինն անմիջապես տեղյակ է պահում դիմողին:

Վերլուծելով վերը նշված քրեադատավարական նորմը առաջին հայացքից թվում է, որ վարույթն իրականացնող մարմինը միջնորդությունների քննարկման և լուծման արդյունքում կայացնում է բացառապես ՈՐՈՇՈՒՄ, սակայն ուսումնասիրելով ՀՀ քրեական դատավարության օրենսգրքի 199-րդ հոդվածը և այն վերոհիշյալ նորմի հետ համակարգային վերլուծությայն ենթարկլով նկատում ենք, որ վարույթն իրականացնող մարմինը կողմի ներկայացված միջնորդության քննարկման և լուժման արդյունքում ՈՐՈՇՈՒՄ է կայացնում միայն ու միայն միջնորդությունը մերժելու կամ դրա քննարկումը հետաձգելու դեպքում, իսկ միջնորդությունը բավարարարելու դեպքում քր. դատ օրենսդրությամբ ՈՐՈՇՈՒՄ կայացնելու հայեցակարգ նախատեսված չէ:

Գործնականում, եթե որևէ կողմի ներկայցված միջնորդությունը քննիչը, հետաքննության մարմնի աշխատակիցը, դատարանը, գտնում են հիմնավոր և անհրաժեշտ են համարում այն բավարարել, ապա վերը նշված դատավարության հանրային սուբյեկտները ընդամենը գրությամբ հայտնում են միջնորդություն հարուցած անձին նրա խնդրանքը բավարարելու մասին առանց դրա վերաբերյա առանձին որոշում կայացնելու: Ուստի կարծում եմ, որ Երևան քաղաքի ընդհանուր իրավասության դատարանի դատավոր Դ.Գրիգորյանը բավարարելով փաստաբան Միհրան Պողոսյանի միջնորդությունը ընդունել է պատշաճ փաստաթուղթ»: