Մինասի որմնանկարները Գյումրիից տեղափոխելու Կառավարության նախաձեռնությունից  անհանգստացած գյումրեցի մի խումբ մշակույթի գործիչներ եւ արվեստի ներկայացուցիչներ բաց նամակ են հղել վարչապետ Տիգրան Սարգսյանին:

Նամակում, մասնավորապես, ասվում է.

«Անցյալ դարի 70-ական թվականների սկզբներին Լենինականի մի շարք գործարանների տնօրինություններ իրենց դրամական միջոցներով պատվիրել են հայ մեծանուն նկարիչ Մինաս Ավետիսյանի որմնանկարներ կատարել իրենց գործարանների համապատասխան տարածքներում, որի արդյունքում ստեղծվել են գեղարվեստական բարձրարժեք ստեղծագործություններ:

Հետեկրաշարժյան տարիներին դադարեցին գործել քաղաքի արտադրական ձեռնարկությունները, եւ շենքերի վթարայնության ու ջերմաստիճանային անբարենպաստ պայմանների հետեւանքով խիստ վտանգվեց որմնանկարների հետագա գոյությունը եւ պահպանությունը:

1990թ. Լենինականի քաղսովետի գործկոմի ջանքերով եւ միջոցներով բուլղարացի մասնագետների միջոցով վերականգնվեց եւ Գյումրիի Վ. Աճեմյանի անվան պետական դրամատիկական թատրոնի շենքում տեղադրվեց վերլուծական սարքերի փորձնական գործարանի շենքի պատին գտնվող  որմնանկարը: Սակայն այս ողջունելի քայլը` որմնանկարների վերականգնումը եւ հետագա ցուցադրումը Գյումրիում, առաջինը եւ վերջինը եղավ: 2010թ. ՀՀ Կառավարության միջոցներով վերականգնվեց եւ Երեւան` Կառավարության շենք տեղափոխվեց երկու որմնանկար: Այս իրողությունը, որ իրենց  համերկրացու որմնանկարները այսուհետ զարդարելու են ՀՀ Կառավարության շենքը, դրական ընդունեցին գյումրեցիները: Սակայն մնացած որմնանակարները եւս Երեւան տեղափոխելու Կառավարության մտադրությունը խիստ դժգոհություն է առաջացրել գյումրեցի արվեստագետների, մտավորականների, հասարակական կազմակերպությունների, ողջ բնակչության շրջանում:

Մենք` ներքոստորագրողներս, հաստատ վճռականություն ենք հայտնում, որ արվեստների եւ մշակույթի քաղաք Գյումրիում են պահպանվելու եւ ցուցադրվելու մեր համերկրացի մեծանուն նկարիչ Մինաս Ավետիսյանի Գյումրիում կատարած որմնանկարները:

Անկախ շինության սեփականության ձեւից, որմնանկարները պատկանում են Գյումրի քաղաքին: Մենք գտնում ենք, որ առանց քաղաքի համաձայնության, հոգեւոր մշակույթային արժեքները տանելը անհարգալից վերաբերմունք է :

Մեր բազմաթիվ հանդիպումները եւ պահանջը Գյումրու քաղաքապետից` Մինասի որմնանակարները վերականգնելու եւ մեր քաղաքում ցուցադրելու աջակցություն են գտել քաղաքապետի  կողմից, որը  հաստատ  հիմք  է  տալիս  հայտարարելու,   որ քաղաքը պատրաստ է համապատասխան դրամական միջոցներ տրամադրել վերականգնելու, Գյումրիում  պահպանելու եւ ցուցադրելու գյումրեցիների հպարտությունը հանդիսացող Մինաս Ավետիսյանի պահպանված որմնանկարները»:

Այս պահին բաց նամակին միացել եւ ստորագրել են Գյումրու արվեստի եւ մշակույթի բնագավառի 493 աշխատակիցներ: Նրանց շարքում են`

1. Զավեն Կոշտոյան -ՀՀ վաստակավոր նկարիչ
2. Համբարձում Ղուկասյան - ԵԳՊԱ-ի Գյումրու մասնաճյուղի տնօրեն
3. Սամվել Պողոսյան - ԵԳՊԱ-ի Գյումրու մասնաճյուղի դոցենտ
4. Գարիկ Մանուկյան - Նկարիչների միության Գյումրու մասնաճյուղի նախագահ
5. Վաչիկ Խաչատրյան – Նկարիչների միության անդամ դոցենտ
6. Ալբերտ Վարդանյան - Նկարիչների միության անդամ քանդակագործ
7. Անդրանիկ Կարապետյան - Բանաստեղծ, ՀԳՄ Շիրակի  մարզային բաժնի նախագահ
8.  Ռոզա Հովհաննիսյան - Բանաստեղծուհի, «Եղեգան փող» թերթի խմբագիր
9. Սերգո Հայրապետյան – ՀՀ ԳԱԱ Շիրակի հայագիտական կենտրոնի տնօրեն,                       
   բանասիրական գիտությունների դոկտոր, պրոֆեսոր
10. Ֆերդինանդ Առաքելյան – Քանդակագործ
11. Վահան Թոփչյան - ԵԳՊԱ Գյումրու մասնաճյուղի դասախոս
12. Արտուշ Պապոյան – Քանդակագործ
13. Ալբերտ Վարդանյան – Քանդակագործ, նկարիչների միության անդամ
14. Համբարձում Բեգոյան – ՀՀ դիզայներների միության եւ միջազգային դիզայն    
 ասոցիացիայի անդամ դիզայներ ԵԳՊԱ- Գ/Մ դասախոս
15. Լաուրա Աթանեսյան - Գյումրու ԳԱԱՇՀՀԿ գիտաշխատող
16. Եսայի Մերոյան – Գեղանկարիչ, ՀՀ նկարիչների միության անդամ
17. Նարինե Հայկազյան - ԵԳՊԱ Գյումրու մասնաճյուղի դասախոս
18. Աղունիկ Բերդիկյան - ԵԳՊԱ Գյումրու մասնաճյուղի դասախոս
19. Երվանդ Վարոսյան - Գյումրու պետ. սսիմֆոնիկ նվագախմբի դիրիժոր
20. Արտաշես Կարապետյան - Գյումրու քաղաքապետարանի մշակույթի եւ  
 երիտասարդության հարցերի բաժնի պետ