Երիտասարադ ակտիվիստների ձերբակալության համար Ադրբեջանի իշխանություններն արժանացել են Եվրախորհրդարանի քննադատությանը:

Խորհրդարանականների կողմից Ադրբեջանում մարդու իրավունքների իրավիճակի վերաբերյալ զեկույցում մասնավորապես նշվում է.  «Եվրախորհրդարանի պատգամավորները մայիսի 12-ի նիստում ընդունված բանաձեւով դատապարտում են երիտասարդ ակտիվիստներ Ջաբար Սավալանի եւ Բախտիյար Հաջիեւի ձերբակալությունները  եւ քննադատում Ադրբեջանում մարդու իրավունքների հետ կապված իրավիճակի վատթարացումը: Ադրբեջանի իշխանությունները  դատապարտվում են լրագրողների եւ քաղաքական ակտիվիստների նկատմամբ ավելացող հետապնդումների համար:

Եվրախորհրդարանի պատգամավորները կոչ են անում ազատ արձակել վերոնշյալ երիտասարդ ակտիվիստներին եւ «Իրական Ադրբեջան»  թերթի գլխավոր խմբագիր Էյնուլլա Ֆաթուլաեւին:

Եվրախորհրդարանը Ադրբեջանի իշխանություններին կոչ է անում հրաժարվել ապօրինի մեղադրանքներից եւ երկրում երաշխավորել լրագրողների պաշտպանությունը»: