«Իսլամական պետությանն» ամբողջությամբ հաղթել հնարավոր չէ, քանի դեռ աշխարհը միջոց չի գտել հաշտեցնելու եւ վերաբնակեցնելու Իրաքում եւ Սիրիայում տարիների պատերազմների արդյունքում տեղահանված հազարավոր մարդկանց: Այս մասին հայտարարել է ԱՄՆ կենտրոնական հրամանատարության հրամանատար, գեներալ Ֆրենկ Մաքքենզին, հայտնում է AP-ն:

Նրա խոսքով` Մերձավոր Արեւելքում փախստականների եւ ներքին տեղահանվածների (տեղահանվածներ) խնդրի լուծման համար ռազմական լուծում գոյություն չունի, որոնք սպասում են հայրենադարձությանը կամ վերաբնակեցմանը, եւ նրանք, իր խոսքերով, զինված հակամարտությունների անցանկալի կողմնակի արդյունքն են:

«Այսօր Սիրիայի եւ Իրաքի հսկայական տարածքներում տեղահանվածների եւ փախստականների ճամբարներում համակարգված գաղափարային մշակում է ընթանում, ինչը տագնապալի իրադարձություն է` հնարավոր հետեւանքներով սերունդների համար»,- ասել է Մաքքենզին: Նա նշել է, որ պետք է լուծում գտնել դիվանագիտական, ուժային եւ հումանիտար կազմակերպությունների համատեղ ջանքերով:

«Եթե միջազգային հանրությունն այդ մարդկանց հայրենադարձնելու, իրենց համայնքներում վերաինտեգրվելու եւ հաշտեցման ծրագրերին աջակցելու միջոց չգտնի, ապա մենք 10 տարի անց ռազմավարական խնդիր կունենանք, երբ այդ երեխաներն արմատականներ մեծանան: Եթե ​​մենք հիմա դրանով չզբաղվենք, իսկապես երբեք չենք հաղթի ԻՊ-ին»,- հավելել է նա:

Նրա խոսքով` ԻՊ-ն չի հրաժարվել խալիֆայությունը վերստեղծելու եւ Արեւմուտքի վրա հարձակման իր ձգտումից: Կարճաժամկետ հեռանկարում ԻՊ-ն ի վիճակի չի լինի լուրջ վտանգ ներկայացնել ԱՄՆ անվտանգության համար, ասել է նա: «Ալ-Քաիդա»-ն եւ համախոհ մարտիկները նույնպես խիստ սահմանափակված են, բայց ոչնչացված չեն: Գեներալը նշել է, որ ԱՄՆ զինված ուժերի եւ այլ կազմակերպությունների կողմից այդ խմբերի վրա գործադրվող ճնշումը դժվարացնում է նրանց համար միջոցների փոխանցումը, պլանների մշակումը եւ արտաքին գրոհների նպատակով անհրաժեշտ մարդկանց տեղափոխումն Իրաքից կամ Սիրիայից: