Երկու ամերիկացիների մեղադրանք է առաջադրվել Ճապոնիայից Nissan-ի նախկին ղեկավար Կառլոս Գոնի փախուստին աջակցելու համար: Նրանց մինչեւ 3 տարվա ազատազրկում է սպառնում, հաղորդում է AFP-ը:

Մեղադրյալները՝ հայր եւ որդի, այս ամսվա սկզբին Միացյալ Նահանգներից տեղափոխվել են Ճապոնիա:

Մայքլ Թեյլորը եւ նրա որդին՝ Փիթերը, մեղադրվում են հանցագործին փախուստի հարցում օգնելու մեջ:

Թեյլորները ձերբակալվել էին ԱՄՆ-ում անցյալ տարի այն ​բանից հետո, երբ Ճապոնիան նրանց ձերբակալելու օրդեր էր տվել:

Նրանք փորձել են բողոքարկել Տոկիոյի արտահանձնման հայցը՝ պնդելով, որ Ճապոնիայում բանտարկված լինելու դեպքում նրաք կբախվեն խոշտանգումների նման պայմանների, սակայն փետրվարին ԱՄՆ Գերագույն դատարանը մերժել է նրանց բողոքը:

Գոնը համաշխարհային բիզնեսի գերաստղ էր եւ ավտոմոբիլային դաշինքի ղեկավար, որը ներառում է Nissan, Renault եւ Mitsubishi Motors ընկերությունները, նրա կարիերան կտրուկ ավարտվեց 2018-ի նոյեմբերին:

Ամիսներ անազատության մեջ մնալուց հետո Գոնը գրավի դիմաց ազատ էր արձակվել եւ փախել երկրից: Ճապոնիայի դատախազությունը դա անվանել էր «նորագույն պատմության մեջ ամենալկտի եւ լավ ծրագրված փախուստներից մեկը»: