նախընտրելի դարձնել
Եվրամիության արտաքին քաղաքական գերատեսչության ղեկավար Ժոսեպ Բորելը իրադարձություններն Աֆղանստանում անվանել է «աղետ» եւ ասել, որ հետախուզությունը չկարողացավ կանխատեսել թալիբների վերադարձն իշխանություն, տեղեկացնում է Reuters-ը։
Դիմելով Եվրախորհրդարանին՝ Բորելն ասել է, որ ԵՄ մոտ 100 աշխատակից եւ ԵՄ-ի հետ աշխատող 400 աֆղանստանցի եւ նրանց ընտանիքները տարհանվել են, բայց եւս 300 աֆղանստանցի դեռեւս փորձում է հեռանալ։ Նա ընդգծել է Եվրոպայի «բարոյական պարտքի» մասին՝ փրկելու որքան հնարավոր է շատ աֆղանստանցիների, ովքեր աշխատել են ԵՄ-ի համար Աֆղանստանում, բայց նշել է, որ բոլորին դուրս բերել չի հաջողվի։
«Թույլ տվեք ինձ ասել հստակ եւ ուղիղ, սա աղետ է»,- ասել է Բորելը։ «Սա աղետ է աֆղան ժողովրդի համար, արեւմտյան արժեքների եւ հեղինակության համար, ինչպես նաեւ միջազգային հարաբերությունների զարգացման համար»։
Իր ելույթում Բորելը անդրադարձել է այն մտահոգություններին, որ աֆղանստանցի միգրանտների նոր ալիքը կարող է հասնել Եվրոպա եւ կրկնել 2015թ. միգրացիոն աղետը։
«Նրանց միգրանտներ մի անվանեք, նրանք վտարված մարդիկ են, ովքեր փախչում են, որպեսզի փրկեն իրենց կյանքը»,- ասել է Բորելը՝ հերքելով համեմատությունները Սիրիայի հետ։
Բորելը տեղեկացրել է, որ շփումներ է ունեցել ՆԱՏՕ գլխավոր քարտուղար Ենս Սթոլտենբերգի հետ, որը ուրբաթ վիրտուալ ճգնաժամային հանդիպում կունենա դաշինքի արտաքին գործերի նախարարների հետ Աֆղանստանի քննարկման համար։
