նախընտրելի դարձնելՀայաստանի փոխվարչապետ Արմեն Գեւորգյանն այսօր ընդունել է Գերմանական վերակառուցման եւ զարգացման բանկի (KfW) պատվիրակությանը եւ նրանց հետ քննարկել KfW-ի հետ համատեղ իրականացվող ծրագրերը:
ՏԿՆ մամուլի ծառայությունից NEWS.am-ին հայտնում են, որ փոխվարչապետը բարձր է գնահատել KfW-ի հետ ձեւավորված համագործակցությունը եւ պատրաստակամություն հայտնել ընդլայնել այն:
Ա. Գեւորգյանը կարեւորել է Կապսի ջրամբարի կառուցման հարցը, որն այժմ բանկի հետ քննարկման փուլում է: Ջրամբարի կառուցումը լուրջ բնապահպանական նշանակություն կունենա` նպաստելով Արփի լճի ջրերի ավելի արդյունավետ օգտագործմանը եւ ավելացնելով ոռոգելի տարածքները: Այն կարող է մասնավոր-պետական հատվածների համագործակցության արդյունավետ մոդել դառնալ:
Փոխվարչապետ նշել է, որ Գերմանական վերակառուցման եւ զարգացման բանկի հետ արդյունավետ համագործակցություն է ձեւավորված ջրամատակարարման համակարգերի բարելավման ոլորտում` մասնավորապես նկատի ունենալով KfW-ի վարկային միջոցներով «Շիրակջրմուղկոյուղի» ՓԲ, «Լոռիջրմուղկոյուղի» ՓԲ, «Նոր Ակունք» ՓԲ ընկերությունների կառավարման եւ դրանց տիրույթում գտնվող ցանցերի արդիականացման ծրագիրը:
Հանդիպման ժամանակ քննարկվել են նաեւ KfW-ի հետ համագործակցության ընդլայնման եւ նոր ծրագրերի իրականացման հնարավորությունները: Կողմերը ընդունելի են համարել Հայաստանում ՀԲ-ի հետ իրականացվող խմելու ջրի ենթակառուցվածքների զարգացմանն ուղղված ծրագրերի համատեղ իրականացման հնարավորության քննարկումը:
