ՆախընտրելիԱՄՆ Կալիֆորնիայի նահանգի Գլենդել քաղաքում օգոստոսի 6-ին կալանավորվել է 42-ամյա մի տղամարդ, ով կասկածվում է գլենդելցի գործարարի ուղղությամբ կրակ բացելու մեջ: Այս մասին հաղորդում է Glendale News-Press-ը:
Սերժանտ Թոմ Լորենցի խոսքով, ոստիկանության աշխատակիցները Արամ Վարիկյանին կալանավորել են կրակոցների հաջորդ օրը, տեղի ժամանակով 23:45-ին: Նա Գլենդելում իր ավտոմեքենայից մի քանի կրակոց է արձակել գործարարի ուղղությամբ:
«Ամենայն հավանականությամբ, այս գործում զոհը հատուկ նշանակետ է եղել: Սա պատահական բռնության գործողություն չէ»,- ասել է սերժանտը:
Ոստիկանության տեղեկացմամբ, հրաձգությունը տեղի է ունեցել ուրբաթ, ժամը 16:53-ին, երբ գործարարը, որի անունը չի հաղորդվում, մոտեցել է Արեւմտյան Կոլորադո փողոցում գտնվող NLE Systems ավտոկայանատեղիին:
Լորենցի խոսքով, մի քանի րոպե անց ականատեսները ոստիկանությանը հայտնել են, որ մոտեցել է արծաթագույն Volkswagen Jetta մակնիշի ավտոմեքենա, այնուհետեւ վարորդը դուրս է եկել, ատրճանակը պահել գործարարի ուղղությամբ եւ մի քանի անգամ կրակել:
Արդեն հաջորդ օրը ոստիկանությունը գտել է կրակողին` Վարիկյանին:
Արարքի դրդապատճառների մասին ոչինչ չի հաղորդվում, քանի որ հետաքննություն է ընթանում, սակայն ոստիկանական դետեկտիվները նշել են, որ, ամենայն հավանականությամբ, կրակոցների պատճառը առեւտրային գործարքի արդյունքում կրած վնասն է:
