նախընտրելի դարձնել
Հայաստանում միջազգային դատարաններում քննվող գործերով խախտումները կարող են հիմք հանդիսանալ դատավորների լիազորությունների կասեցման համար։ Այս մասին հունիսի 14-ին Ազգային ժողովի նիստին ՀՀ դատական օրենսգրքում (սահմանադրական օրենք) փոփոխություններ եւ լրացումներ կատարելու մասին օրինագծի քննարկման ժամանակ ասաց ՀՀ արդարադատության փոխնախարար Գրիգոր Մինասյանը։
Նա, մասնավորապես, հայտնեց, որ նախնական տարբերակով առաջարկվում էր կարգավորումը տարածել ՄԻԵԴ-ի քննած գործերով հայտնաբերված խախտումների բոլոր դեպքերի վրա։ «Սակայն Վենետիկի հանձնաժողովն առաջարկեց սահմանափակել օրենքի հետադարձ ուժի ժամկետը՝ այն սահմանելով ՄԻԵԴ-ի որոշման՝ ուժի մեջ մտնելուց հետո մինչե 15 տարի։ Այս առնչությամբ նշենք, որ 2008-2018 թթ. ՄԻԵԴ-ում հարուցվել է մի քանի գործ: Դրանցից մի քանիսը դեռ հետաքննության փուլում են։ Մյուսների մասով Մարդու իրավունքների եվրոպական կոնվենցիայի խախտումներ են արձանագրվել։ ՄԻԵԴ-ը սեփականության իրավունքի, կյանքի իրավունքի, խոշտանգումների արգելման, ազատության եւ անձնական անձեռնմխելիության, արդար դատաքննության իրավունքի, հավաքների եւ միավորումների ազատության խախտումներ է արձանագրել»,- հայտնեց Մինասյանը։
Իշխող «Քաղաքացիական պայմանագիր» խմբակցության պատգամավոր Արուսյակ Ջուլհակյանն ի պատասխան հարցրեց՝ արդյո՞ք այդ փոփոխությունն իրենից հնարավորություն է ներկայացնում «Մարտի 1»-ի գործով դատավճիռներ կայացրած դատավորներին պատասխանատվության ենթարկելու համար։ Փոխնախարարը դրական պատասխան տվեց: «Այո, Դուք ճիշտ եք: Այս փոփոխությունը հնարավորություն է տալիս 15 տարի հետ գնալ եւ ուսումնասիրել ՄԻԵԴ-ի կայացրած որոշումները։ Եթե դրանցում կոնկրետ դատավորների կողմից թույլ տրված դիտավորյալ խախտումներ հայտնաբերվեն, ապա մենք կարող ենք գործը բարձրացնել կարգապահական վարույթի շրջանակներում եւ միջնորդություն ներկայացնել Բարձրագույն դատական խորհուրդ։ Այդ խախտումը կատարած դատավորը, գործող օրենսդրական մեխանիզմներով, կարող է պատասխանատվության ենթարկվել»,- ընդգծեց Մինասյանը:
