ԱՄՆ-ի նախագահ Ջո Բայդենը երեքշաբթի երեկոյան Կալիֆոռնիայում կայացած քաղաքական դրամահավաքի ժամանակ Չինաստանի նախագահ Սի Ծինփինին անվանել է «բռնապետ»՝ մեկ օր անց այն բանից հետո, երբ ԱՄՆ  պետքարտուղար Էնթոնի Բլինքենն ասել էր, որ իր վերջին այցով «առաջընթաց» է գրանցել Վաշինգտոնի ու Պեկինի միջեւ հարաբերությունների վերականգնման գործում, հայտնում է CNN-ը։

«Պատճառը, թե ինչու էր Սի Ծինփինը շատ վրդովվել, երբ ես խոցեցի լրտեսական սարքավորումներով լի երկու առեւտրային վագոններով այդ օդապարիկը, այն է, որ նա չգիտեր, որ այն  այնտեղ է: Չէ, ես լուրջ եմ ասում: Դա ամենամեծ ամոթն է բռնապետերի համար, երբ նրանք չգիտեին, թե ինչ է տեղի ունեցել», - դրամահավաքի մասնակիցներին ասել է Բայդենը ՝ նկատի ունենալով չինական օդապարիկը, որն ԱՄՆ-ն խոցել էր այս տարվա սկզբին:

ԱՄՆ-ի նախագահը երեքշաբթի նաեւ մանրամասնել է երկու երկրների միջեւ շարունակվող լարվածության որոշ ասպեկտների մասին։ Նա ասել է, որ մինչդեռ Չինաստանի առաջնորդը «շփոթվել էր» օդապարիկի միջադեպից, այն, ինչ «իրոք վրդովեցրել էր նրան», Բայդենը պաշտոնը ստանձնելուց ի վեր ջանքեր է գործադրում քառյակի ՝ ԱՄՆ-ի, Հնդկաստանի, Ավստրալիայի եւ Ճապոնիայի առաջնորդներին ավելի մոտեցնելու» համար՝  «որպես հակակշիռ նպատակասլաց Չինաստանին»:

«Նա զանգահարեց ինձ եւ ասաց, որ չանեմ դա, քանի որ դա նրան դժվար դրության մեջ է դնում», - ասել է Բայդենը՝ նկատի ունենալով Չինաստանի նախագահին։ «Մենք պարզապես փորձում ենք համոզվել, որ օդային եւ ծովային երթեւեկության միջազգային կանոնները գործում են»:

Հեռուստաալիքը նշում է, որ ԱՄՆ-ի նախագահի՝ ակնհայտորեն գործի հետ կապ չունեցող հայտարարություններն արվել են ԱՄՆ-Չինաստան հարաբերություններում առանձնակի լարված շրջանի ֆոնին։

CNN-ը կապ է հաստատել Սպիտակ տան հետ նախագահի մեկնաբանության վերաբերյալ։

Բայդենն իր ելույթում նաեւ բարձր է գնահատել Բլինքենի աշխատանքը հարաբերությունների վերականգնման գործում՝ կրկնելով, որ նա «լավ աշխատանք է կատարել» եւ հավելել, որ հարաբերությունների բարելավումը «ժամանակ կպահանջի»։ Բայդենը դոնորներին ասել է, որ «ԱՄՆ-ի կլիմայի հարցերով բանագնաց Ջոն Քերին, հուսով եմ, շուտով նույնպես կմեկնի Չինաստան՝ շեշտը դնելով շրջակա միջավայրի հարցերի վրա»: