Չիլիացիները կրկին գնում են ընտրությունների, որպեսզի որոշեն՝ պե՞տք է փոխել իրենց սահմանադրությունը, որը սկիզբ է առնում Ավգուստո Պինոչետի բռնապետության ժամանակներից, գրում է Reuters-ը։

Երկար տարիների ընթացքում սա երկրորդ դեպքն է, երբ Չիլիում քվեարկություն է անցկացվում   սահմանադրությունը փոխելու հարցով:

Սահմանադրության նախագիծն այժմ դրվել է քվեարկության և համարվում է, որ այն ավելի պահպանողական  և շուկայական ուղղվածություն ունի, քան 1980 թվականի սահմանադրությունը։

Առաջարկվող տարբերակն առաջնահերթություն է տալիս մասնավոր սեփականության իրավունքներին և ներգաղթի ու աբորտի վերաբերյալ խիստ կանոններին:

Մի քանի ամսվա հարցումները ցույց են տվել, որ ընտրողներն, ամենայն հավանականությամբ, կմերժեն նաև այս առաջարկը, սակայն իրավիճակը փոխվել է  հանրաքվեի նախաշեմին: Դեկտեմբերի 1-ին անցկացված վերջին հարցումը ցույց է տվել, որ 47%-ը (նոյեմբերի 10-ի համեմատ -3 միավոր) մտադիր է դեմ քվեարկել, իսկ  38%-ը (+6 միավոր)՝ հավանություն տալ նախագծին։