Էլեկտրական մեքենաներ արտադրող Tesla-ի նախկին գործադիր տնօրեն Լինդա Ջոնսոն Ռայսը «այնքան է անհանգստացած ընկերության սեփականատեր, միլիարդատեր Իլոն Մասկի թմրանյութերի օգտագործմամբ և անկանխատեսելի պահվածքով, որ որոշել է չվերընտրվել ընկերության տնօրենների խորհրդի կազմում», ասվում է The Wall Street Journal պարբերականի նոր զեկույցում: 

Ռայսը, որը երկամյա ժամկետ է անցկացրել ընկերության տնօրենների խորհրդում, որն ավարտվել է 2019 թվականին, բազմիցս խոսել է Tesla-ի խորհրդի անդամների հետ Մասկի կողմից հոգեմետ նյութերի օգտագործման վերաբերյալ իր մտահոգությունների մասին, գրում է պարբերականը։

Ռայսը նաև ոչ պաշտոնապես հարցրել է, թե արդյոք հարկ է, որ խորհուրդը  հետաքննի Մասկի թմրանյութերի օգտագործումը, որը, ըստ խնդրին  ծանոթ մարդկանց, ներառում է կետամին, LSD, կոկաին և էքստազի, սակայն նրա մտահոգությունները անտեսվել են, գրում է թերթը:

ԶԼՄ-ի լայնածավալ զեկույցը մանրամասնում է, թե ինչպես են Մասկի ընկերությունների ղեկավարները փորձել լուծել նրա թմրանյութերի օգտագործման և հասարակական անկանոն ելույթների ու հայտարարությունների խնդիրները:

Ըստ զեկույցի, Tesla-ի որոշ ղեկավարներ օգնություն են խնդրել Մասկի եղբորից՝ Քիմբալայից, սակայն «նրանք զգույշ են եղել և չեն օգտագործել «թմրանյութ» բառը՝ իրենց մտահոգությունները պատմելիս»:

Պարբերականի ներկայացրած տվյալներով, նաև ենթադրություն է արվել, որ միլիարդատերը ալկոհոլի ազդեցության տակ է եղել, երբ 2018-ին   թվիթերում գրել է, որ «ֆինանսապես ապահովված է» ավտոմեքենաների ընկերությունը՝ մեկ բաժնետոմսը 420 դոլարով սեփականաշնորհելու համար: Թվիթը, որը հաջորդ օրը Tesla-ի բաժնետոմսերը բարձրացրեց 6%-ով,  հետաքննության պատճառ դարձավ, որի հետևանքով Մասկի դեմ 40 միլիոն դոլարի տուգանքներ նշանակվեցին, թեև նա չընդունեց իր մեղքը:

Միևնույն ժամանակ, միլիարդատիրոջ փաստաբանը հայտնել է, որ Մասկը «պարբերաբար և պատահականորեն թմրանյութերի թեստավորում է անցնում SpaceX-ում և երբեք չի ձախողել թեստը», գրում է Business Insider-ը։