Պակիստանի իշխանությունները հայտնել են, որ 7 զինվոր է զոհվել, ևս 17-ը վիրավորվել են զինյալների հարձակման հետևանքով, որոնց թիրախը Աֆղանստանին սահմանակից անհանգիստ Հյուսիսային Վազիրստան շրջանում գտնվող  բանակային պահակակետն է եղել, հայտնում է Reuters-ը:

«Ահաբեկիչները պայթուցիկներով լի բեռնատարով  մխրճվել են պահակակետը, որին հաջորդել են  մահապարտ-ահաբեկիչների բազմաթիվ գրոհներ, որոնք հանգեցրել են շենքի մի մասի փլուզմանը», - ասվում է Պակիստանի զինվորականների հայտարարության մեջ:

Հյուսիսային Վազիրստանի Հայբեր Փախտունխվա նահանգի բնակիչները հայտնել են, որ տեղական ժամանակով ժամը 06:15-ի սահմաններում ուժգին պայթյունի հետևանքով վնասվել են իրենց տների դռներն ու պատուհանները:

Բանակը հայտնել է, որ բեռնատարի պայթյունի հետևանքով զոհվել է հինգ զինվոր, իսկ հաջորդած փոխհրաձգության ժամանակ՝ երկու սպա: Բոլոր վեց հարձակվողները սպանվել են, տարածքում մաքրման գործողությունները դեռ շարունակվում են:

Սակայն Պակիստանի բանակը որևէ կոնկրետ խմբավորման դեմ մեղադրանք չի առաջադրել։