Ոստիկանությունը բացահայտվել է 18 տարի առաջ տեղի ունեցած սպանության դեպքը:

Ոստիկանության մամուլի ծառայությունից NEWS.am-ին հայտնում են, որ դեկտեմբերի 5-ին, սպանություն կատարելու կասկածանքով, բերման են ենթարկվել  նախկինում 4 անգամ դատապարտված, 72-ամյա Յուրիկ Նասիբյանը եւ 38-ամյա Աշոտ Խաչատրյանը:

Պարզվել է, որ նրանք 1993 թվականի մայիսի 20-ի երեկոյան, հանցավոր համաձայնության գալով, բնակարան գնելու պատրվակով մտել էին Շինարարների փողոցի բնակարաններից մեկը, որտեղ Աշոտ Խաչատրյանը խոհանոցային դանակով սպանել էր տանտիրուհի Թամարա Դերզյանին, եւ հափշտակելով տարբեր հնաոճ իրեր` հեռացել էին:

Օրեր առաջ ՀՀ ոստիկանության օպերատիվ-քննչական խումբը մեկնել էր ՌԴ Վլադիմիր քաղաք, որտեղ հափշտակված իրեղեն ապացույց հանդիսացող հնաոճ ափսեն ճանաչման է ներկայացվել տուժողի դստերը, որը ճանաչել է մոր տնից հափշտակված իրը:

Հափշտակված իրերը մասամբ առգրավված են:

Յուրիկ Նասիբյանն ու Աշոտ Խաչատրյանը ձերբակալված են:

Նախաքննությունը կատարում է ոստիկանության Մաշտոցի քննչական բաժինը: