Իռլանդական Ryanair ավիաընկերությունը 15 հազար եվրոյի հայց է ներկայացրել ուղևորի դեմ՝ իր չվերթներից մեկում անկարգապահ պահվածքի համար՝ հայտնում է Euronews-ը։

Դա իր տեսակի մեջ առաջին քաղաքացիական հայցն է Իռլանդիայում, որը ներկայացվել է էժան ավիաընկերության թռիչքի ժամանակ ուղևորի անպատասխանատու վարքագծի պատճառով: Անցյալ տարի Դուբլինից Լանզարոտե չվերթը չեղարկվել էր խնդրո առարկա ուղևորի պատճառով։

Ավիաընկերությունը նախազգուշացրել է, որ սա վերջին անգամը չէ, որ իրավական միջոցներ կձեռնարկի իր ինքնաթիռում անընդունելի վարքագծի համար:

Դեկտեմբերի 20-ին Ryanair-ը հայց է ներկայացրել Իռլանդիայի շրջանային դատարան՝ ավելի քան 15,000 եվրոյի չափով վնասի փոխհատուցման պահանջով մի ուղևորի դեմ, որի պատճառով Դուբլինից Լանզարոտե չվերթը տեղափոխվել է Պորտուգալիա: Ինքնաթիռը ստիպված է եղել կանգ առնել Պորտոյում 2023 թվականի ապրիլի 9-ի գիշերը, և ավիաընկերությունը ստիպված է եղել 160 ուղևորի գիշերակաց տրամադրել հյուրանոցում։

«Այս ուղևորի աններելի պահվածքի պատճառով չվերթը շեղվել է դեպի Պորտո, որտեղ մնացել է ամբողջ գիշեր, ինչի հետևանքով 160 ուղևորներ բախվել են անհարկի խնդիրների, ինչպես  նաև կորցրել են իրենց արձակուրդից մի ամբողջ օր: Միանգամայն անընդունելի է, որ ուղևորները, ովքեր քրտնաջան աշխատում են ընտանիքի/ընկերների հետ ուղևորությունը վայելելու համար, զրկվում են այդ հաճույքից՝ մեկ ուղևորի ոչ պատշաճ պահվածքի պատճառով»,- ասվում է Ryanair-ի հաղորդագրության մեջ։

Ավիաընկերությունը ոչ մի լրացուցիչ տեղեկություն չի տրամադրել ուղևորի ինքնության կամ թռիչքի տեղափոխման կազմակերպման մասին։