Եվրոպական երկրներին մոտ 10 տարի կպահանջվի մարտունակ զինված ուժեր և հզոր ռազմարդյունաբերական համալիր ձևավորելու համար, որը կախված չի լինի ԱՄՆ-ից։ Այս մասին հայտնում է The Economist բրիտանական ամսագիրը։

Պարբերականի համաձայն՝ եվրոպական շատ երկրների համար այսօր դժվար կլիներ թեկուզ մեկ մարտունակ բրիգադ ստեղծել, մինչդեռ ուկրաինական հակամարտությունը երկու կողմից ներառում է մոտ 230 նման ստորաբաժանումներ։ Եվրոպական «Bruegel» վերլուծական կենտրոնի հաշվարկների համաձայն՝ Եվրոպան պետք է 50 նոր բրիգադներ ձևավորեր՝ փոխարինելու 300,000 ամերիկյան զինվորականներին, որոնք կարող են տեղակայվել մայրցամաքում պատերազմի դեպքում:

Միաժամանակ, ինչպես նշել է ամսագիրը, եվրոպական երկրներին անհրաժեշտ է զգալի միջոցներ հատկացնել տեխնոլոգիական ինքնավարության համար։ Ջասթին Բրոնքը, Լոնդոնում տեղակայված Royal United Services Institute for Defense and Security Studies (RUSI) գիտաշխատող, ասում է, որ Եվրոպան գրեթե ամբողջությամբ կախված է ԱՄՆ-ից հետախուզության, հսկողության, թիրախների ձեռքբերման և հետախուզման հարցերում:

RUSI-ի մեկ այլ փորձագետ Մեթյու Սավիլն ասել է, որ ներդրումներ են անհրաժեշտ եվրոպական ռազմական բոլոր ճյուղերում: Նա, մասնավորապես, կարծիք է հայտնել, որ նույնիսկ Մեծ Բրիտանիան, որն ունի բավականին հզոր օդուժ, չի կարողանա երկարաժամկետ ինտենսիվ օդային արշավ իրականացնել, ինչպիսին Իսրայելն է իրականացնում Գազայի հատվածում։