Նախընտրելի
Շիական «Հեզբոլլահ» կազմակերպությունը Սիրիայում շարունակվող հակամարտության կողմ չէ եւ կտրականապես մերժում է իր հասցեին հնչող անհիմն մեղադրանքները։ Այս մասին նշվել է նրա մամուլի ծառայության հայտարարությունում՝ կապված Սիրիայի ափամերձ շրջաններում տեղի ունեցող իրադարձությունների հետ, որտեղ բախումներ են տեղի ունենում նոր իշխանությունների անվտանգության ուժերի եւ տեղի աշխարհազորայինների միջեւ։
«Որոշ ներկայացուցիչներ մեղադրում են «Հեզբոլլահին» այն բանում, որ այն իբր կանգնած է Սիրիայի արեւմուտքում մարտի 6-ին սկսված ռազմական էսկալացիայի հետեւում»,- նշվել է տեքստում։ «Մենք մերժում ենք այս անհիմն մեղադրանքները եւ պահանջում ենք, որ լրատվամիջոցները ճշգրիտ լինեն իրենց հաղորդումներում»։ Շիական կազմակերպության ղեկավարությունը կոչ է անում ԶԼՄ-ներին «չներքաշվել «Հեզբոլլահին» վարկաբեկելու արշավի մեջ, որը ծառայում է արտաքին խաղացողների քաղաքական օրակարգի կասկածելի նպատակներին»։
Մարտի 9-ին Լաթաքիա նահանգում սիրիական անվտանգության ուժերի ներկայացուցիչ Սաջիդ ադ Դիկը իրադրության ապակայունացման պատասխանատվությունը դրել է լիբանանյան «Հեզբոլլահի» վրա։ Al Arabiya հեռուստաալիքի հարցազրույցում նա պնդել է, որ լիբանանցի շիաները «աջակցում են Սիրիայի նախկին նախագահ Բաշար Ասադի կողմնակիցների ջոկատներին սիրիական ափամերձ շրջանների որոշ հատվածներում»:
