նախընտրելի դարձնելԿոլումբիական Erpac հանցագործ խմբավորման առաջնորդներից մեկը` Խոսե Լոպես Մոնտերոն («Caracho» մականունով), 283 գրոհայինների հետ միասին, հանձնվել է Կոլումբիայի իշխանություններին:
Գրոհայինների հանձնվելը իրավապահ մարմիններին տեղի է ունենում Մետա դեպարտամենտի մայրաքաղաք Վիլյավիսենսիոյում: Գրոհայինները հանձնում են նաեւ զենքը, ներկա պահին նրանք 47 ինքնաձիգ են հանձնել, մեկ գնդացիր եւ բազմաթիվ փամփուշտներ: Ակնկալվում է, որ իրավապահ մարմիններին իրենց զենքերը կհանձնեն թմրամիջոցների անօրինական առեւտրով զբաղվող խմբավորման 400 գրոհայիններ:
Սա Կոլումբիայի հանցագործ խմբավորումների խոշորագույն զանգվածային կապիտուլյացիան էր:
The Guardian-ը տեղեկացնում է, որ զանգվածային կապիտուլյացիայի պատճառներն անհայտ են: Վերջերս Լոպեսը լրատվամիջոցներին հայտնել էր, որ հոգնել է պատերազմից: Մի շարք փորձագետների կարծիքով` գրոհայինների հանձնվելուն նախորդել է թմրամիջոցների առեւտրով զբաղվող, «Խելագար» մականունով հայտնի Դանիել Բարերայի խմբավորման հետ հակամարտությունը: Նա Կոլումբիայի ամենաազդեցիկ թմրաբարոններից է, նշում է AFP-ն:
Ինչպես տեղեկացրել է դատախազ Նեստոր Արմանդո Նովոան, Լոպեսին մի շարք մեղադրանքներ են ներկայացվել:
Նովոայի խոսքով` 300-ից ավելի դատախազներ, քննիչներ եւ սոցիալական աշխատակիցներ են աշխատում խմբավորման մասնակիցների գործերի վրա:
