Իսրայելի պաշտպանության բանակը (ՑԱԽԱԼ) կշարունակի ակտիվորեն հարվածներ հասցնել Լիբանանի տարածքին՝ ճնշում գործադրելու համար Բեյրութի վրա երկկողմ հարաբերությունները սեփական պայմաններով կարգավորելու համար: Այս մասին գրել է էմիրաթների The National թերթը՝ հղում կատարելով աղբյուրներին։

ԱՄՆ եւ Ֆրանսիայի միջնորդության արդյունքում 2024թ. նոյեմբերի 27-ին կնքված երկկողմ հրադադարի համաձայնագիրը նախատեսում էր, որ Իսրայելն ամբողջությամբ դուրս կբերի իր ուժերը Լիբանանից մինչեւ 2025թ. փետրվարի 18-ը, իսկ շիական «Հեզբոլլահ» կազմակերպության զինված ուժերը կհեռանան երկրի հարավային հատվածից։ Սակայն իսրայելական բանակի հրամանատարությունը հայտարարել է, որ անորոշ ժամանակով իր վերահսկողության տակ է մնալու Լիբանանի տարածքում գտնվող հինգ ռազմավարական կետեր, որոնք գտնվում են սահմանային գոտում գերիշխող բլուրների վրա։ Լիբանանը բազմիցս մեղադրել է հրեական պետությանը հարվածների պատճառով համաձայնագիրը խախտելու մեջ, իսկ Իսրայելը հայտնել է «Հեզբոլլահի» կողմից սադրանքների մասին։

Ըստ լիբանանցի բարձրաստիճան զինվորականի՝ երկրի ղեկավարությունն ակնկալում է, որ Իսրայելի պաշտպանության բանակն ավելի շատ հարվածներ կհասցնի եւ կպահպանի ներկայությունն այս հինգ ռազմավարական կետերում, քանի դեռ Իսրայելը չի ​​կարողանա Լիբանանին ստիպել քայլեր ձեռնարկել հարաբերությունները կարգավորելու համար: Ամերիկացի պաշտոնյան The National-ին ասել է, որ Իսրայելի ռազմավարությունն է՝ մեծացնել ճնշումը Լիբանանի նոր ղեկավարության վրա՝ հրեական պետության պայմաններով խաղաղ համաձայնագրերի հասնելու համար: «Սա երկարաժամկետ, կայուն մոտեցում է»,- ավելացրել է թերթի աղբյուրը։

Միեւնույն ժամանակ, Լիբանանն ինքը հակված չէ լիովին կարգավորել հարաբերություններն Իսրայելի հետ, որի հետ երկիրը ներկայում չունի դիվանագիտական ​​հարաբերություններ, եւ սահմանների ու տնտեսական գոտիների հետ կապված հարցերի լայն շրջանակ մնում է չլուծված։ Չնայած կողմերը մարտի սկզբին պայմանավորվել են բանակցություններ վարել սահմանների շուրջ, դրանք լինելու են զուտ տեխնիկական բնույթի եւ ԱՄՆ-ի, Ֆրանսիայի եւ ՄԱԿ միջնորդությամբ, հարաբերությունների կարգավորման մասին խոսք չկա, ընդգծել է թերթի աղբյուրը Լիբանանի ղեկավարությունում։

Սպասվում է, որ չորեքշաբթի Բեյրութ կգա ֆրանսիացի հատուկ ներկայացուցիչը, ինչից հետո մարտի 28-ին Լիբանանի նախագահ Ջոզեֆ Աունը կմեկնի Փարիզ երկօրյա այցով՝ քննարկելու բանակցությունների անցկացումը։