Իշխող «Քաղաքացիական պայմանագիր» կուսակցության պատգամավոր Վահագն Ալեքսանյանը հունիսի 17-ին ՀՀ Ազգային ժողովի նիստում դիմեց գործարար և «Հայաստանի էլեկտրական ցանցեր» ընկերության ղեկավար Սամվել Կարապետյանին՝ կոչ անելով նրան չխառնվել քաղաքականությանը և կենտրոնանալ ՀՀ բնակչությանը պատշաճ էլեկտրաէներգիայի մատակարարման հարցի վրա։ 

«Տաշիր քաղաքից «Հայաստանի էլեկտրական ցանցեր» ընկերության սեփականատեր Սամվել Կարապետյանը միացել է կուսակրոնությունը խախտած հոգևորականների պաշտպանության արշավին», - ասել է Ալեքսանյանը։

Պատգամավորի խոսքով՝ գործարարը, ամենայն հավանականությամբ, փորձում է իր համար քաղաքական կամ կիսաքաղաքական պաշտպանություն ապահովել։

Ալեքսանյանը հետաքրքիր համարեց, որ Կարապետյանը որոշել է նման քայլի դիմել հենց այն ժամանակ, երբ իշխանությունները հարցեր ունեին իր ընկերության կողմից մատուցվող ծառայությունների որակի վերաբերյալ։

Հիշեցնենք, որ մայիսի 29-ին կառավարության նիստում ՀՀ վարչապետ Նիկոլ Փաշինյանը քննադատել է մի շարք եկեղեցիների վիճակը՝ դրանք անվանելով «աղբով լի չուլաններ»։ Հաջորդ օրը նա կոշտ գրառում է հրապարակել՝ ուղղված Հայ Առաքելական Եկեղեցուն և հոգևորականությանը՝ արքեպիսկոպոսներից մեկին մեղադրելով անբարոյական վարքի մեջ։ Ավելի ուշ նրա կինը՝ Աննա Հակոբյանը, նույնպես վիրավորական հայտարարություններ է արել կաթողիկոսի և հավատացյալների դեմ՝ Գարեգին Բ-ին անվանելով «գլխավոր մաֆիոզ», իսկ նրա կողմնակիցներին՝ «երկրի գլխավոր պեդոֆիլներ»։ Հունիսի 9-ին Փաշինյանն ավելի հեռուն է գնացել՝ բացահայտ մեղադրելով կաթողիկոսին իր կուսակրոնությունը խախտելու մեջ՝ հայտարարելով, որ վերջինս երեխա ունի։ Կառավարության ղեկավարը սպառնացել է ապացույցներ ներկայացնել՝ կոչ անելով հոգևոր առաջնորդին թողնել իր պաշտոնը, իսկ հավատացյալներին՝ «ազատել պատրիարքական նստավայրը»։