Tehran Times պարբերականի գլխավոր խմբագիրը հայտարարել է, որ մենք նույնիսկ  Tehran Times-ի խմբագրությունից չենք հեռանալու, առավել ևս՝ Թեհրանից։ Դրա մասին հունիսի 17-ին լրագրողների հետ զրույցում հայտարարել է Հայաստանում Իրանի արտակարգ և լիազոր դեսպան Մեհդի Սոբհանին՝ մեկնաբանելով Թրամփի հայտարարությունները, ըստ որոնց Թեհրանի բնակիչները պետք է տարհանվեն։

«Շատ կարևոր է ճիշտ ընկալել Իրանում տիրող տրամադրությունը։ Արևմտյան երկրների հետ խնդիրն այն է, որ նրանք ծանոթ չեն իրանական հասարակության առանձնահատկություններին։

«Սիոնիստական ​​ռեժիմն արդեն հասկացել է, որ հզոր պետության դեմ պայքարը նույնը չէ, ինչ բացօթյա բանտի վերածված Գազայի քաղցած երեխաների վրա ռումբեր նետելը»,-շեշտել է Սոբհանին։

Իսրայելի կիրառած բլիցկրիգի մարտավարությունը Երկրորդ համաշխարհային պատերազմի ժամանակ կիրառել է նացիստական ​​Գերմանիան, հիշեցրել է դեսպանը։

«Այդ մարտավարությունը նպատակ ունի հոգեբանորեն կոտրել հակառակ կողմին և ճգնաժամ ստեղծել կառավարման համակարգում։ Սակայն նրանք չկարողացան ազդել Իրանի՝ իրավիճակին արձագանքելու և հակահարված տալու պատրաստակամության վրա։ Երկրորդ համաշխարհային պատերազմից հետո չկար որևէ այլ երկիր, որը կայծակնային պատերազմից հետո կարողանար վերակազմակերպվել և ավելի հզոր հարված հասցնել թշնամուն», - ընդգծել է դիվանագետը։

Սոբհանին հիշեցրել է, որ Իսրայելի հարձակումների հետևանքով զոհվել է 224, վիրավորվել՝ 1200 մարդ, որոնց 90%-ը խաղաղ բնակիչներ են։

Դեսպանը կրկին շեշտել է, որ Իրանը չի ձգտում միջուկային զենք մշակել, և որ Իսրայելը նման հայտարարություններով փորձում է մոլորեցնել Արևմուտքին, ձգտելով նրանց Իրանի դեմ հարձակումների մեղսակիցներ դարձնել։