նախընտրելի դարձնել
Ատոմային էներգիայի միջազգային գործակալության (ԱԷՄԳ) գլխավոր տնօրեն Ռաֆայել Գրոսին հայտնել է, որ նամակ է գրել Իրանի արտաքին գործերի նախարար Աբաս Արաղչիին՝ հանդիպում առաջարկելով եւ համագործակցության կոչ անելով Իրանի եւ Իսրայելի միջեւ հրադադարի հայտարարումից հետո։
Գրոսին X սոցիալական ցանցում նշել է, որ Իրանի եւ Ատոմային էներգիայի միջազգային գործակալության միջեւ համագործակցության վերսկսումը կարող է հանգեցնել Թեհրանի միջուկային ծրագրի շուրջ երկարատեւ վեճի դիվանագիտական լուծմանը:
Հիշեցնենք, որ Իրանը հերքում է, որ ձգտում է միջուկային զենք ստեղծել: Նմանատիպ գնահատական են հնչեցրել նաեւ ամերիկյան հետախուզական գործակալությունները:
Ավելի վաղ Իրանի խորհրդարանի համապատասխան հանձնաժողովը հաստատել էր մի ծրագիր, որը կդադարեցներ Ատոմային էներգիայի միջազգային գործակալության հետ համագործակցությունը:
Իրանն ավելի վաղ հայտարարել էր, որ ԱՄՆ եւ Իսրայելի հարվածները տեղի չեն ունեցել վակուումում, այլ Վաշինգտոնի եւ նրա եվրոպացի դաշնակիցների անօրինական գործողությունների, ինչպես նաեւ ԱԷՄԳ կողմնակալ վարքագծի ուղղակի հետեւանքն են:
